Ньурбатааҕы көтөр фабрикатыгар сымыыт хаачыстыбатын бэрэбиэркэлииллэр

Ньурбатааҕы көтөр фабрикатыгар быйыл саас саҥа кууруссалары атыыласпыттара. Бу кууруссалар сымыыттаан эрэллэр. Онтон бородууксуйа бастаан бэтэринээринэй-санитарнай чинчийиини ааһар.

Ньурбатааҕы бэтэринээринэй-чинчийэр лабораторияҕа саҥа кууруссалар сымыыттарын аҕалан, чинчийтэрдилэр диэн Бэтэринээрийэ департамена иһитиннэрэр.

Бэтэринээринэй-санитарнай чинчийии кэмигэр бастаан сымыыт өҥүн, ырааһын, хаҕын туругун көрөллөр. Сымыыт хаҕа ыраас, бүтүн, кытаанах буолуохтаах.

Онтон сымыыт хаачыстыбатын овоскоп диэн анал приборунан быһаараллар — манна хаҕын, уоһаҕын туруга, үрүҥүн өҥө, кытаанаҕа быһаарыллар. Сымыыт хайдыбыт, үрүҥэ маҥхайбыт, эбэтэр, уоһаҕа үрүҥүн кытта булкуспут буоллаҕына, атыыга таһаарбаттар.

Овоскопка күүстээх уотунан тыктаран, сымыыты ыйдаҥардан, курдары көрөллөр. Чоппууска үөскээн эрэр буоллаҕына, манна тымырыгар тиийэ ырылхайдык көстөр.

Сымыыт — доруобуйаҕа олус туһалаах уонна минньигэс ас. Онон олохтоох, туһалаах аһы дэлэтиэҕиҥ!