«Ньургуһун саха хорсун сибэккитэ – чулуу дьоммут дьулуурдарынан»!

Ыам ыйын 16 күнүгэр «Айылҕа уонна биһиги» XVIII өрөспүүбүлүкэтээҕи аахсыйа чэрчитинэн Саха сиригэр Ньургуһун күнүнэн «Ньургуһун саха хорсун сибэккитэ – чулуу дьоммут дьулуурдарынан»! тэрээһин ыытыллар диэн СӨ Экологиятын министиэристибэтин пресс-сулууспата иһитиннэрэр.

Бу тоҥ буору тобулан саас эрдэ тахсар, ураты тулуурдаах ньургуһун сибэккигэ ананар тэрээһини СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэ уонна Нам улууһун Хатырык нэһилиэгэ буолаллар. Партнердарынан Дьахталлар сойуустара, «Крылья» дьахталлар кулууптара, СӨ Уопсастыбаннай балаата, Дьокуускай куорат Губинскай уокуругун сэбиэтэ, «Бастакылар хамсааһыннара» оҕо тэрилтэтэ буолаллар.

Сибиэһэй салгын, биир санаалаахтары кытары көрсүһүү, кэрэ айылҕа – киһи туругун тупсарар, ссанаатын көнньүөрдэр. Айылҕалыын алтыһыы кыһалҕаны киэр илгэр, куту-сүрү бөҕөргөтөр. Тэрээһин «Арассыыйа уутун баайа» Бүтүн Арассыыйатааҕы аахсыйа чэрчитинэн Өлүөнэ өрүскытылын ыраастааһынтан саҕаланыаҕа. Итини сэргэ бырагыраамаҕа «Саха-этнофитнесс» тэрилтэ айылҕаҕа тахсан эти-сиини чэбдигирдиини ыытыаҕа, маастар-кылаастар, быыстапка-дьаарбаҥкалар тэриллиэхтэрэ.

Бу күн ким баҕалаах бэйэтэ маастар-кылаас, быыстапка тэрийэн ыытыан, экологическай ыраас табаардары атыылыан сөп. Тэрээһин ыам ыйын 16 күнүгэр Нам улууһун Хатырык нэһилиэгэр ыытыллар.