Ньургуһун туһунан хоһоон күрэҕин кыайыылаахтарын быһаардылар

 «Талба талаан» бырайыак чэрчитинэн «Ньургуһун таптал сибэккитэ» диэн хоһоон өрөспүүбүлүкэтээҕи күрэҕин  түмүктүүр поэзия киэһэтэ ыам ыйын 17 күнүгэр  Өксөкүлээх Өлөксөй аатынан Норуоттар доҕордоһууларын  дьиэтин Гостинай саалатыгар  буолан ааста.

Бу күрэх Ньургуһун аан дойдутааҕы күнүгэр ананан, муус устар 15 күнүттэн ыам ыйын 12 күнүгэр диэри биллэриллибитэ.

Күрэҕи хоһоонньуттар уонна прозаиктар «Айар Кут сойуус» түмсүүтүн салайааччыта, СӨ уонна РФ доруобуйатын харыстабылын туйгуна, СӨ Ырыа айааччыларын сойууһун чилиэнэ Зоя Никандровна Данилова-Кэкэрдэ уонна Өксөкүлээх Өлөксөй аатынан Норуоттар доҕордоһууларын дьиэтин Норуоттар икки ардыларынааҕы отделын кылаабынай методиһа Любовь Егоровна Шишигина тэрийэн ыыттылар.

Күрэххэ элбэх хоһоон киирэн,  хас да күннээх сүбэ үлэтэ буолла. Ньургуһуҥҥа кэрэхсэбили, аан дойдуга тапталы  үөскэтии, айылҕа кэрэтин сэргээһин, табан хоһуйуу,  хоһоон ис тутулун арыйыы, сонуннук таба көрүү, хоһоон тутулун сөпкө суруйуу диэн ирдэбиллэр турбуттара.

Хоһооннору сыаналааһыҥҥа дьүүллүүр сүбэҕэ бэрэссэдээтэлинэн Саха сирин Суруйааччыларын сойууһун чилиэнэ, Бүтүн Арассыыйатааҕы уонна өрөспүүбүлүкэтээҕи поэзия күрэхтэрин лауреата, хас да төгүллээх кыайыылаах Ольга Янцен, ону сэргэ СӨ доруобуйаҕа харыстабылын туйгуна, тыл үөрэҕин магистра, хоһоон айааччы, тылбаасчыт Валентина Комиссарова-Күлүмүрэ, СӨ Суруйааччыларын сойууһун чилиэнэ Варвара Семенова-Байбарылаах Балбаара, эдэр суруйааччылар сойуустарын чилиэнэ Саргын Кыыһа Уран Күннэй үлэлээтилэр.

Күрэххэ киирбит  хоһооннору  Валентина Иннокентьевна Комиссарова-Күлүмүрэ кылгастык ырытта, сүбэ үлэтин хаамыытын кэпсээтэ, баҕа санаатын хоһоонньуттарга тиэртэ.

Бу дьоро күнү Любовь Каратаева салайааччылаах этно-фолк бөлөх тойугунан, кылыһахтаах ырыанан, хомус тыаһынан эҕэрдэлээн арыйдылар.

Салҕыы «Чараҥ» квартет,  СӨ Ырыа айааччылар сойуустарын чилиэннэрэ, мелодист ырыаһыттар Намчы, Барахсаана, Намыына, Долгун  Лилия гитара доҕуһуолунан авторскай ырыаларын ыллаан киэргэттилэр, күрэх кыттыылаахтарын эҕэрдэлээтилэр.

 Ольга Андреевна Янцен күрэххэ киирбит хоһооннору ырытан кэпсээтэ, ол кэннэ күрэх түмүгүн иһитиннэрдэ.

Кыайыылаахтарга наҕараада туттарыыга дьүүллүүр сүбэ бары чилиэннэрэ тахсан, күүтүүлээх түгэн күргүөмнээхтик үөрүү-көтүү быыһыгар ааста.

Кыайыылаахтар бэйэлэрин  хоһооннорун   аахтылар, махталларын тириэртилэр. Бары кыттыылаахтары эҕэрдэлээн, Туоһу сурук туттарылынна.

Тэрийээччилэр Зоя Никандровна, Любовь Егоровна  алаадьылаах төгүрүк остуол тула ыҥыран сэргэх киэһэ, кылгас сэһэргэһиинэн түмүктэннэ.

Ньургуһун олоххо тардыһыы  күүһүн чаҕылхай бэлиэтэ буолан,  саха ньургуһунугар элбэх ырыа ылланан, хомоҕой  хоһоон сурулла турдун диэн баҕа санаабытын тиэрдэбит.

Итини сэргэ Өксөкүлээх Өлөксөй аатынан Норуоттар доҕордоһууларын дьиэтин  Норуоттар икки ардыларынааҕы отделын кылаабынай методиһа Любовь Егоровна Шишигина ыҥырыытынан биолог-ботаник Варвара Степановна ньургуһун туһунан хартыыналары уонна хаартысканан быыстапканы туруоран,  мустубут дьоҥҥо ньургуһун сибэкки Саха сирин киэҥ муннугар биэс араас өҥүнэн үүнэрин көрдөрөн кэпсээтэ.

х х х

Күрэх түмүгүнэн кыайыылаахтар ааттаннылар.

Кылаан кыайыылааҕынан Дьокуускай куораттан  хоһоонньут Галина Трушкова буолла.

Бастакы миэстэни Андросова Л.Н. (Мэҥэ Хаҥалас улууһа), иккис миэстэни  Егорова М.Е. (Ньурба улууһа), үһүс миэстэни Васильев И.А. (Хаҥалас улууһа) ыллылар.

I истиэпэннээх дипломунан Софронов А.М. (Нам улууһа), II истиэпэннээх дипломунан  Михайлова С.С. (Дьокуускай),  III  истиэпэннээх дипломунан Тарасова Л.И. (Дьокуускай к.) наҕараадаланнылар.

Номинациялартан “Кыһыл көмүс бөрүөнү”  Лукин С.Т. (Дьокуускай),  “Үрүҥ көмүс бөрүөнү” Софронов Н.Н. (Өлүөхүмэ),  “Боруонса бөрүөнү” Куличкина Т.А. (Дьокуускай) ыллылар.

Кэкэрдэ Зоя