Ньургуйаана Эбиль – харах уран ууһа

Хайа да омукка “Хараҕыҥ харатын курдук харыстаа” диэн бэргэн этии баар. Киһиэхэ харах аламай күнү, аар айылҕаны, күбэй ийэни маҥнайгынан билиһиннэрэр уоргаммыт.

Олох обургу умсулҕаныгар харахпытын харыс­таабакка, аахайбакка, сороҕор оһоллонон, көрөрбүт мөлтүүр. Офтальмология өрөспүүбүлүкэтээҕи балыыһатыгар саас ортолоох, уонна сааһырбыт дьон элбэхтик эмтэнэр. Аҕыс уон, аҕыс уоннарын лаппа ааспыт кырдьаҕастар да күн сирин күндүтүн көрө түһэр дьулуурдара улахан.

Дуоктар Иван Луцкан салайааччылаах бу улахан кэлэктиип хас мүнүүтэтин, чааһын дьону харыстыырга аныыр. Сууйар-сотор үлэһититтэн хируругар тиийэ биир кэлим, тиргиччи үлэлээх дьон эбиттэр. Бэйэлэрин үлэлэрин толору баһылаабыт эмчиттэр, ол иһигэр 10 хирург дьон-сэргэ махталын ылан, айымньылаахтык үлэлиир.

Кинилэртэн мин эмтэммит, эпэрээссийэлэммит киһи быһыытынан, хирург Ньургуйаана Егоровнаҕа махталбын тириэрдэбин. Сэҥээрэр кинигэҕэ киниэхэ анаан элбэх үтүө тыл этиллибит. Эмтэнэн үтүөрбүт дьон хирург Ньургуйаана Эбили сөбүлээн билиммит.

Үлэтинэн киэҥ билиилээх, түргэн-тарҕан туттуулаах, эмтэниигэ истиҥ сыһыаннаах, чугас сүбэлээх, тиэрдэр тыл­лаах буолан, ыарыһах биһирэбилин ыллаҕа. Көмүскэ иһигэр, харах дьүккэтин курдук кыра уоргаҥҥа эпэрээссийэ оҥорооччулар – офтальмолог-хирурдар киһиэхэ үрүҥ күн сырдыгын хаттаан төнүннэрэн дьоллуур дьылҕа хаан анаан ыыппыт дьоно.

Кинилэртэн биирдэс­тэрэ, эдэр бэйэлээх, кэрэ киһи Ньургуйаана Эбиль – харах уран ууһа. Бу балыыһаҕа күҥҥэ ортотунан отуччаҕа тиийэ эпэрээссийэ оҥоһуллар. Ньургуйаана Егоровна үрдүк категориялаах хирург, үтүө сүбэһит, билиитин күннэтэ хаҥатынар, эмтиир дьонун чугас киһилэрэ. Эдэр, сайдыылаах үлэһит билим да өттүнэн бардаҕына, харах өттүгэр көдьүүһэ улахан буо­луоҕар саарбахтаабаппын.

Харах – орто дойду олоҕун сирэй кэрэһитэ. “Хараҕы оҕо эрдэхтэн харыстыахтаахпыт” диэн эмчит чопчулаан этэрэ оҕолорго, төрөппүттэргэ тус туһаайыылаах.

Валерий МИХАЙЛОВ.