Ньургун Бэчигэн норуоттар икки ардыларынааҕы киинэ бэстибээлин наҕараадатыгар тигистэ

Саха артыыһа Ньургун Бэчигэн норуоттар икки ардыларынааҕы киинэ бэстибээлин наҕараадатыгар тигистэ.

Ол курдук киниэхэ «Кыталыктаах кырдалым» киинэҕэ оруолун иһин наҕараада туттардылар. Атырдьах ыйын 29 күнүгэр «Восток Запад. Классика и авангард» диэн норуоттар икки ардыларынааҕы киинэ бэстибээлин түмүктэрин таһаардылар. Саха артыыһа Ньургун Бэчигэҥҥэ «Лучший актёр» номинацияҕа  «Золотой Сарматский лев» кыһыл көмүс статуэтканы туттарбыттар. Кини киинэҕэ дьиэ кэргэн аҕа баһылыгын оруолун итэҕэтиилээхтик толорбута.

Арассыыйа киинэлэрин «Сплетенные параллели» диэн куонкуруска уон үлэ кыттыбыт. Манна Алексей Романов «Легенды вечных снегов»  уонна «Ласточка» диэн Малика Мухамеджан үлэлэрэ кыттыбыта.  Бүтэһик киинэ «Окно в Европу» киинэ бэстибээлигэр  киинэ кириитиктэрин бирииһигэр тиксибитэ. Маны сэргэ Дмитрий Давыдов «Чума» киинэтэ эмиэ наҕараадаҕа тиксибит.

Бэлиэтээн суруйдахха, «Кыталыктаах кырдалым» бу сылга саха бастыҥ киинэтэ буолла. Анадырьга «Золотой ворон» киинэ бэстибээлигэр мээнэҕэ гран-при ааты ылбатаҕа. Соторутааҕыта киинэни Кытайга Арассыыйа киинэтэ күннэригэр көрдөрбүттэрэ. Онуоха киинэ көрөөччүлэри долгуппут.