Ньургун Скрябин уонна Арыйаан Тютрин Беларусь чөмпүйэнээтигэр кыайдылар

Тохсунньу 12 күнүгэр Миинскэйгэ көҥүл тустууга Беларусь өрөспүүбүлүкэтин чөмпүйэнээтэ түмүктэннэ. Саха сирин тустууга оскуолатын иитиллээччилэрэ ситиһиилээхтик кытыннылар.

Ол курдук, 57 киилэҕэ диэри ыйааһыҥҥа аан дойду, Европа чөмпүйэнээттэрин призера Арыйаан Тютрин Димчик Батомункуевы кыайан, кыһыл көмүс мэтээли ылары ситистэ.

Онтон 65 киилэҕэ диэри ыйааһыҥҥа Европа чөмпүйэнээтин финалиһа Ньургун Скрябин Ислам Гусейновы 8:6 ахсааҥҥа кыайан, кыайыы өрөгөйүн бу өрөспүүбүлүкэ чөмпүйэнээтигэр төрдүс төгүлүн биллэ диэн «Өрөгөй» успуорка бэлэмнээх буолуу киинин пресс-сулууспата иһитиннэрэр.