Ньурмаҕаннар болдьох иннинэ куоластаатылар

Бүгүн Нерюнгри улууһун Иенгра сэлиэнньэтин 388 №-дээх учаастактааҕы быыбардыыр хамыыһыйатын бэрэссэдээтэлэ Туяна Колесова, бэрэссэдээтэли солбуйааччы Ксения Ковалева уонна хамыыһыйа чилиэнэ Алена Колесова «Ньурмаҕан» эбэҥкилэр көһө сылдьар общинатыгар тиийэн болдьох иннинэ куоластааһыны ыыттылар. Бу община Иенграттан тэйиччи, уустук суоллаах-иистээх сиргэ көһө сылдьар.

Онон Нерюнгри улууһун территориятыгар Арассыыйа Бэрэсидьиэнин быыбарыгар бастакынан «Ньурмаҕан» 6 быыбардааччыта куоластаата диэн СӨ Киин быыбардыыр хамыыһыйата иһитиннэрэр.

Болдьох иннинэ куоластааһыны «Саха» НКИХ уонна «Индустрия Севера» маассабай иһитиннэрэр сириэстибэлэр аккредитацияламмыт бэрэстэбиитэллэрэ уһуллулар.

Итини сэргэ болдьох иннинэ куоластааһын хаамыытын көрө СӨ Киин быыбардыыр хамыыһыйа чилиэннэрэ Алла Самойлова уонна Евгений Рябченко сырыттылар.