Нюргуна Соколова чөлүгэр түһэрии ыытылла турар Нам улууһугар сырытта

Үөрэх уонна билим миниистирэ Нюргуна Соколова Нам улууһун баһылыга Юрий Слепцовы, улуустааҕы үөрэх управлениетын начаалынньыга Мария Игнатьеваны кытта үөрэх тэрилтэлэригэр сырыттылар.  

Бастакынан, Маймаҕаҕа оскуола-уһуйааны көрдүлэр. Тэрилтэ балачча улаханнык ууга барбыт икки эбийиэктээх. Оскуола-уһуйааҥҥа баар 18 оҕону кэмигэр эвакуациялаабыттар. Үөрэх уонна билим министиэристибэтэ Нам улууһун дьаһалтатын кытта дьиэ салгыы үлэлиир боппуруоһун быһаарыахтара.

Иккиһинэн, М.К. Аммосов аатынан Хатырык орто оскуолатыгар сырыттылар. Оскуола эксээмэн ыытыллар пууна буолар. Миниистир кэбиниэттэри көрдө, эксээмэн ыытыллар усулуобуйатын билистэ.

Салгыы чөлүгэр түһэрэр үлэни Үөрэх уонна билим министиристибэтэ бэйэтэ сүрүннүүр Граф Биэрэгэ сэлиэнньэтигэр сырытта. Субуотунньукка күннэтэ үөрэх, билим тэрилтэлэрин уонна былаас уорганын бэрэстэбиитэллэрэ тиийэн үлэлииллэр. Миниистир дьиэлэрэ ууга барбыт “Ромашка” уһуйааны, Затон сүрүн уопсай үөрэхтээһин оскуолатын, Намнааҕы тиэхиньикуму көрдө. Нюргуна Афанасьевна педагогтары кытта кэпсэттэ, тэрилтэлэр баайдарын-дуолларын хоромньутун быһаарарга уонна көмө оҥоһуллуутугар сүбэ биэрдэ, халаан содулун түргэнник туоратарга дьулуһууларын өйөөтө. Улууска үөрэх тэрилтэлэрин дьиэлэрин чөлүгэр түһэрэр, бөҕөргөтөр үлэ салҕанар.

Үөрэх уонна билим министиэристибэтэ.