Нюргуна Соколова “Россия – мои горизонты” дьарыгы ыытта

Кулун тутар 14 күнүгэр дойду бары оскуолаларыгар уонна кэллиэстэригэр “Россия – мои горизонты” куурус уочараттаах дьарыга буолла. Бу “Россия в развитии: было, стало, будет” диэн тиэмэҕэ ананна. Үөрэнэччилэр, устудьуоннар уруоктан Арассыыйа атын эрэгийиэннэригэр  бырамыысыланнас, билим, култуура уонна да атын суолталаах салаалар, хайысхалар хайдах сайдалларын билэллэр. “Россия – мои горизонты” идэҕэ эрдэттэн туһаайар (профориентационный) куурус РФ Үөрэҕириитин министиэристибэтин көҕүлээһининэн ыытыллар, бырайыагы сүрүннээччинэн Гуманитарнай бырайыактар пуондалара буолар.  

Өрөспүүбүлүкэтээҕи лиссиэй-интэринээт инженернэй хайысхалаах 10-с кылааһын үөрэнээччилэригэр үөрэх уонна билим миниистирэ Нюргуна Соколова уруок ыытта. Миниистир оҕолорго Арассыыйа эрэгийиэннэринэн кылгас билиһиннэриини оҥордо, устуоруйа түгэннэрин ырытта уонна хас биирдии эрэгийиэн бэйэтэ дэҥҥэ көстөр суолталааҕын, уратылааҕын бэлиэтээтэ.

Нюргуна Афанасьевна дойду араас салаатын экэниэмикэтэ сайдарыгар национальнай бырайыактар сүҥкэн оруолламмыттарын кэпсээтэ. “Үөрэхтээһин” национальнай бырайыагы сиһилии билиһиннэрдэ. “Үөрэхтээһин” национальнай бырайыак баар буолан өрөспүүбүлүкэ үгүс нэһилиэнньэлээх пууннарыгар, куораттарыгар үөрэх саҥа эбийиэктэрэ тутуллалларын, онтон оскуолалар, кэллиэстэр аныгы тэрилинэн хааччыллалларын эттэ. Ону тэҥэ, миниистир Саха сиригэр салаалары сыыппараҕа көһөрүү көхтөөхтүк барарын, экэниэмикэ саҥа салаалара сайдалларын кэпсээтэ. Биһиги өрөспүүбүлүкэбит пилота суох көтөр аппарааттар бырайыактарын олоххо киллэрэр Арассыыйа 30 эрэгийиэниттэн биирдэстэрэ буолар.

Миниистир ыыппыт дьарыга оскуола биир умнуллубат түгэнинэн буоларыгар саарбахтаабаппыт. Маннык уруоктар үөрэнээччилэр билиилэрин-көрүүлэрин кэҥэтэллэригэр, Арассыыйа дьоһуннаах гражданина буолуу диэн тугун туһунан саҥалыы, дириҥ уонна сэргэх түмүк оҥостоллоругар көмөлөһөр.

Үөрэх уонна билим министиэристибэтин пресс-сулууспата.