Нюргуна Соколова Саха сирин сүүмэрдэммит хамаандатын – физкултуураҕа Бүтүн Арассыыйатааҕы үөрэнээччилэр олимпиадаларыгар кыттааччылары кытта көрүстэ

Үөрэх улахан тэрээһинэ саҕаланыа — физкултуураҕа Бүтүн Арассыыйатааҕы үөрэнээччилэр олимпиадаларын түмүктүүр түһүмэҕэр диэри аҕыйах хонук хаалла. Үөрэнээччилэр олимпиадалара Дьокуускайга муус устар 12-18 күннэригэр ыытыллыаҕа. Өрөспүүбүлүкэ дойду 79 эрэгийиэниттэн 290 үөрэнээччини, 100-тэн тахса арыаллааччыны көрсүөҕэ.

Аҕыйах хонуктааҕыта үөрэх уонна билим миниистирэ Нюргуна Соколова Саха сирин сүүмэрдэммит хамаандатын кытта көрүстэ. Быйыл тустаах олимпиадаҕа өрөспүүбүлүкэ сүүмэрдэммит хамаандатыгар киирэн 8 оҕо кыттыаҕа. Кинилэр бары күһүҥҥүттэн үс үөрэтэр түмсүүнү ааспыттар.

Сүүмэрдиир хамаандаҕа сүрүннээн Дьокуускай куорат оскуолаларын үөрэнээччилэрэ киирэллэр уонна икки спортсмен Нерюнгри куораттан. Кинилэр бары физкултуураҕа учууталларын салайыытынан, бэйэлэрин эйгэлэригэр ааттаах-суоллаах тириэньэрдэргэ дьарыктаналлар.

Өрөспүүбүлүкэ биир биллэр тириэньэрэ, Дьокуускай куорат 2-с нүөмэрдээх национальнай политиэхиньиичэскэй оскуолатын физкултуураҕа учуутала Светлана Константинова кэпсииринэн, кини иитиллээччилэрин кытта тустаах олимпиадаҕа 2000 сылтан кыттар. “Өрөспүүбүлүкэ тас өттүгэр аҕыста бара сылдьыбыппыт, өрүү миэстэлэһэбит, быйыл кыайыыга суоттанабыт, бэлэммитигэр уонна төрөөбүт сирбит көмөлөһөрүгэр эрэллээхпит” – диэн Светлана Семеновна этэр.

Олимпиада кыттааччыта, Дьокуускай куорат 17-с нүөмэрдээх оскуолатын 11-с кылааһын үөрэнээччитэ Ирина Федорова долгуйарын этэр. “Олимпиадаҕа бэлэмнэнэрим сэргэ биир кэлим эксээмэҥҥэ күүстээх бэлэмнэнии барар. Кыһыл көмүс мэтээлгэ суоттанабын, онон улахан эппиэтинэстээхтик сананабын. Санкт-Петербурга П.Ф. Лесгафт аатынан физическэй култуура, успуорт уонна доруобуйа национальнай судаарыстыбаннай университетыгар киирэр былааннаахпын. Олохпун тириэньэр үлэтин кытта ситимниэхпин баҕарабын, Бүтүн Арассыыйатааҕы олимпиадаҕа кыайыы миэхэ олус улахан суолталаах” – диэн Ирина этэр.

Миниистир Нюргуна Соколова: “Эһиги соруккут – күүскүтүн-уоххутун барытын ууран туран кыттыы, долгуйууну ааһан, кыайыыга суоттаныы. Онтон биһиги эһиги олимпиада түһүмэхтэрин ааһаргыт уонна дойду араас эрэгийиэннэриттэн кэлбит саастыылаахтаргытын кытта доҕордоһор ураты эйгэҕитигэр табыгастаах усулуобуйаны тэрийэр туһугар туох кыалларын барытын оҥоро сатыахпыт” – диэн кыттааччыларга туһаайан эттэ. Ону тэҥэ, миниистир үөрэнээччилэр инникитин бэлэмнэниилэрин тупсарыы, чуолаан атын эрэгийиэннэр сүүмэрдэммит хамаандаларын кытта өрөспүүбүлүкэ тас өттүгэр үөрэтэр түмсүүнү тэрийии суолталааҕын ыйда. Бу туһунан Үөрэх уонна билим министиэристибэтин пресс-сулууспата суруйар.