Хаартыска: ЯСИА.
Өрөспүүбүлүкэ үөрэҕириитин систиэмэтин тутула учууталлар штаттарын сарбыйбакка эрэ, саҥардыллан иһэр. Бу туһунан миниистир Нюргуна Соколова «Якутия 24» ханаалга «Актуальное интервью» биэриигэ кэпсээтэ.
Кини этэринэн, бары уларыйыылар штатнай араспысаанньаны нормативка сөп түбэһиннэрэр уонна эрэгийиэн уратытын учуоттуур сыаллаахтар.
«Ааспыт сылга үөрэҕи салайар систиэмэҕэ киэҥ далааһыннаах үлэ ыытылынна. Бу улахан үлэҕэ элбэх салайар быһаарыылар ылылыннылар. Бу үлэҕэ олоҕуран, эрэгийиэн таһымыгар модельнай штатнай табылыыссаны бигэргэттибит», — диэн миниистир тоһоҕолоон бэлиэтээтэ. Кини эрэгийиэннээҕи модель ааспыт сайын бигэргэммит федеральнай стандартартан уратытын бэлиэтээтэ.
— Ону оҥорорбутугар өрөспүүбүлүкэбит сирин-уотун, географическай, демографическай уратыларын учуоттаатыбыт, — диэн быһаарда Нюргуна Соколова.
Бу үлэ түмүгүнэн, муниципальнай тэриллиилэри кытта чопчу бииргэ үлэлээһини олохтуур кыах баар буолбутун миниистир тоһоҕолоон бэлиэтээтэ. «Биһиги хас биирдии муниципальнай тэриллиини уонна улуустары кытта сөбүлэһиигэ кэллибит уонна миэстэтигэр үөрэх кыһаларын иһигэр буолуохтаах уларыйыылары чуолкайдык өйдүүбүт», — диэтэ кини уонна бары кыттааччыларга уларыйыылар хайдах буолалларын эрдэттэн иһитиннэрбиттэрин эбэн эттэ. Миниистир уларыйыылар педколлективка дьайбаттарын тоһоҕолоото.
«Учууталлар кэлэктииптэригэр оптимизация миэрэлэрэ дьайбаттар. Бу каадыр кыраапыгын сөп түбэһиннэрии эрэ боппуруоһа», — диэтэ Нюргуна Соколова. Кини этэринэн, уларыйыылар сүрүннээн дьаһайар, салайар, сүрүн уонна көмөлөһөр үлэһиттэргэ дьайаллар.
«Холобур, үлэһит ахсаанын өттүнэн уларыйыылар 500-тэн тахса дириэктэри солбуйааччы дуоһунаһыгар дьайаллар. Ол гынан баран, биһиги 500 дириэктэри солбуйааччыны ууратыы туһунан эппэппит — үксүн атын дуоһунастарга көһөрүү эбэтэр хос дуоһунастары суох оҥоруу туһунан этэбит», — диэн миниистир быһаарда.
Ону тэҥэ, бу барыта үлэ сокуоннары тутуһан ыытылларын бэлиэтээтэ. Биирдиилээн дуоһунастарга уларыйыылары кытта, штатнай араспысаанньаҕа саҥа дуоһунастар эбиллэллэр.
«Оскуолаларга методист дуоһунаһын хаттаан киллэрэбит. Урукку өттүгэр сокуон уларыйыыларынан методистар штатнай араспысаанньалартан туоратыллыбыт буоллахтарына, быйылгыттан саҕалаан, үөрэх кыһаларыгар төннөллөр», — диэтэ миниистир уонна бу дириэктэри солбуйааччыларга методическай үлэҕэ көһөр кыаҕы биэрэрин бэлиэтээтэ.
Саха сиригэр 32 саастаах киһиэхэ суут бириигэбэрэ таҕыста. Кини өлбүт аймахтарын счеттарыттан харчы уорбут уонна…
Гренландия Трампка Арктика баайыгар суол буолар. Гренландияттан сылтаан Трамп кинини утары саҥарбыт аҕыс дойдуга 10%-наах…
Тохсунньу 21-23 күннэригэр Саха сирин үөрэҕин үлэһиттэрин тохсунньутааҕы мунньаҕа буолуоҕа. Биир былаһааккаҕа Саха сирин үөрэҕин…
Мобильнай биригээдэлэр өрөспүүбүлүкэтээҕи кииннэрин бырайыага Уһук Илиҥҥэ уонна Арктикаҕа инники күөҥҥэ сылдьар бырайыак быһыытынан билинилиннэ.…
Тохсунньу 19 күнүгэр С.А.Зверев-Кыыл Уолун аатынан СӨ Үҥкүү национальнай тыйаатырыгар “С.А.Зверев-Кыыл Уолун Үҥкүү национальнай тыйаатырыгар…
2025 сылга Социальнай пуонда Саха сиринээҕи салаата 17-гэр диэри саастаах 105 тыһыынчаттан тахса оҕоҕо биир…