ОДьКХ өҥөтүн төлөбүрүгэр субсидияны туһанабыт

Өскөтүн дьиэ кэргэн ыйдааҕы дохуотун 15%-тан хомунаалынай өҥөҕө ороскуоттуур буоллаҕына, төлөбүр ороскуотун толуйарга субсидияны туһаныахха сөп.

Бу өйөбүл миэрэтин биэрии усулуобуйатын туһунан СӨ ОДьКХ министиэристибэтин пресс-сулууспата билиһиннэрдэ.

«Субсидия элбэх кыбартыыралаах дьиэлэргэ ОДьКХ өҥөтүгэр, хапытаалынай өрөмүөн усунуоһугар кэтэх дьиэлэргэ хомунаалынай өҥөлөргө туһаныахха сөп: уот төлөбүрүгэр, кытаанах уонна убаҕас  тобохтору таһыыга, ууну аҕалан хааччыйыыга бэриллэр, диэн биэдэмистибэҕэ бэлиэтээтилэр.

ОДьКХ өҥөтүгэр субсидияны оҥорторуу ирдэбиллэрэ:

• ОДьКХ төлөбүрүгэр иэһэ суох буолуу;
• Дьиэ кэргэн ОДьКХ ороскуота уопсай дохуотун 15%-тан үрдүк буолуута;
• РФ гражданстволаах буолуу.

Субсидия алта ый болдьоххо бэриллэр. Докумуоннары ый 1-кы чыыһылатыттан 15-гэр диэри туттардахха – субсидия  ый 1-кы чыыһылатыттан ананар. Оттон докумуоннары ый 16-с чыыһылатыттан ый бүтүөр диэри туттардахха – кэлэр ый 1-кы чыыһылатыттан ананар. Алта ый кэнниттэн, туох да уларыйыы тахсыбатаҕына, субсидия саҥа болдьоххо сайабылыанньата суох уһатыллар. Сайабылыанньаны биэрээччи дохуотун туһунан сибидиэнньэни бэйэтэ аҕалар түгэнигэр, саҥа болдьоххо сайабылыанньа суруйуохтаах. Сайабылыанньаны «Мин докумуоннарым» киин офистарыгар тиийэн эбэтэр «Госуслуги» портал нөҥүө онлайн туттарыахха сөп. Болдьоҕо – тоҕус үлэ күнэ. Хайдах кээмэйдээх субсидияны ылыаххытын сөбүн билиэххитин баҕардаххытына, бу сигэнэн киирэн табыгастаах калькуляторынан туһанан, тутатына хоруйу билсиҥ. Сиһилии консультацияны Саха сиринээҕи Субсидия ааҕыныстабатын контакт-киинин 8 800 222-50-70 нүөмэригэр эрийэн билсиэххитин сөп.