ОДьКХ министиэристибэтин бөлөҕө Өймөкөөҥҥө айаннаата

ОДьКХ министиэристибэтин үлэһиттэрэ Өймөкөөн улууһугар халаан кэнниттэн чөлүгэр түһэрии үлэлэрин ыытыыга көмөлөһө бардылар. Биригээдэ састаабыгар министиэристибэ уонна «СӨ ОДьКХ» ГУТ, «Теплоэнергосервис» АУо, «Водоканал» АУо, «Сахаэнерго» АУо, «Якутскэнерго» ПАУ, «Якутскэкосети» ХЭУ уонна «СӨ ОДьКХ уонна энергияны сөпкө туһаныы киинэ» ГАТ тэрилтэлэриттэн 12 үлэһит киирдэ.

«Биһиги билигин тутаах соруктарбыт – эмсэҕэлээбит сэлиэнньэлэр олохтоохторун өйөөһүн уонна дьиэлэрин түргэнник чөлүгэр түһэрии. Өрөспүүбүлүкэ ОДьКХ уонна энергетика үлэһиттэрэ дьоҥҥо көмө наада буоллаҕына мэлдьи инники кирбиигэ сылдьаллар. Биһиги  халаан содулун түргэнник туоратарга уонна олоҕу-дьаһаҕы хааччыйар бары систиэмэлэр  үлэлэрин хааччыйарга туох кыалларынан барытын оҥоруохпут», – диэн  ОДьКХ миниистирэ Вячеслав Емельянов бэлиэтээтэ.

Үлэлиир бөлөх иннигэр тутаах сорук турда – алдьаммыт инфраструктураны түргэнник чөлүгэр түһэрэн, Өймөкөөн улууһун эмсэҕэлээбит сэлиэнньэлэрин олохтоохторун сылааһынан, уунан уонна уотунан эрэллээхтик хааччыйыы. Түргэнник дьаһанар инниттэн бөлөҕү икки бөлөххө араардылар.

Бастакы бөлөх анаммыт сиригэр бэҕэһээ айаннаата. Бүгүн сарсыарда, атырдьах ыйын 23 күнүгэр,  хамаанда иккис бөлөҕө наадалаах тэриллэринэн хааччыллан, ыксаллаах быһыы-майгы буолбут оройуоҥҥа турунна. Идэлээхтэр үлэлэрэ эрэгийиэн ситимнэрин түргэнник чөлүгэр түһэриигэ уонна саахал содулларын кыччатыыга туһуланар.

Ил Дархан Айсен Николаев сорудаҕынан Өймөкөөн улууһугар эбии күүстэр кэлэ тураллар. Улуус нэһилиэнньэлээх пууннарыгар Тырааныспар, ОДьКХ министиэристибэлэрин биригээдэлэрэ үлэлии сылдьаллар, сотору кэминэн СӨ Тутууга, Бырамыысыланнаска уонна Инновацияҕа министиэристибэлэрин үлэлиир бөлөхтөрө бараллара былааннанар.