ОДьКХ оттугу уу тырааныспарынан тиэйии бастакы түһүмэҕин түмүктээтэ

Бэс ыйыгар Амма филиалын наадыйыытыгар Амма өрүһүнэн, оттон Бүлүү өрүһүнэн Үөһээ Бүлүү уонна Ньурба филиалларыгар чоҕу тиэйии түмүктэннэ.

Тиэйии уопсай кээмэйэ 98,9 тыһ. туоннаҕа тэҥнэстэ. Бу туһунан тэрилтэ пресс-сулууспата иһитиннэрдэ.

Ону таһынан, салгыы арктическай улуустарга тиэйэргэ анаан Кыһыл Сыыр бөһүөлэгиттэн Сангардааҕы нефтебаазаҕа 11,8 тыһ. туонна газоконденсатнай оттук тиэйэн ыытылынна. Быйылгы арктическай навигация чэрчитинэн уопсайа 131,1 тыһ. туонна чоҕу, 41 тыһ. туонна ньиэп оттугу уонна 11,4 тыһ. туонна газоконденсатнай оттугу тиэрдэр былааннанар.

Оттук сүрүн кээмэйэ Дьааҥы, Эдьигээн, Орто Халыма, Булуҥ уонна Аллараа Халыма улуустарын хааччыйыыга ананар.  ОДьКХ күһүҥҥү-кыһыҥҥы кэмҥэ бэлэмнэниитин чэрчитинэн оттугу тохтоло суох тиэйиини хааччыйыы сүрүн соругунан буолар.