Одьулууҥҥа ыллыктаах кэпсэтиилэр

Степан Саргыдаев баһылыктаах  Чурапчы улууһугар СӨ Бырабыыталыстыбатын Бэрэссэдээтэлин бастакы солбуйааччы Дьулустаан Борисов салайар өрөспүүбүлүкэ ситэриилээх былааһын отчуота саҕаланна. Ол курдук, Одьулуун нэһилиэгэр отчуот олохтоох култуура киинин дьиэтигэр ыытыллар.

Бу ааспыт сылы нэһилиэк үгүс ситиһиилэрдээх түмүктээбит. Ол курдук, «Комплекс» бааһынай хаһаайыстыбата Аллараа Бэстээххэ 500 туонна оту бэлэмнээбит. Орто оскуола 85 сыллаах үбүлүөйүн бэлиэтээбиттэр. Бу бэлиэ түгэни көрсө оскуола Арассыыйа Бэрэсидьиэнин граныгар кыттан, оҕуруот аһын хаһаанар, оскуола иһинэн арассаада олордор кластеры арыйбыттар. Людмила Ефремова баһылыктаах нэһилиэк итинтэн атын ситиһиилэрин эмиэ элбэҕи ааттыахха сөп.

Отчуоту улуус баһылыга Степан Саргыдаев арыйда. СӨ Тыатын хаһаайыстыбатын уонна аска-үөлгэ бэлиитикэтин миниистирин солбуйааччы Сахаяна Павлова өрөспүүбүлүкэ бырабыыталыстыбатын ааспыт сыллааҕы үлэтин отчуотун сырдатта. Дакылаакка нэһилиэк олоҕор сыһыаннаах былырыыҥҥы туруорсуулары чорботон кэпсээбитин олохтоохтор сэргии иһиттилэр.

Павел Константинов суолга тиэхиньикэнэн түҥнэри көтөн сүөһү, сылгы эчэйэрин, ону буруйдаахтар толуйуохтаахтарын наадатын эттэ. Өртөөһүн боппуруоһугар экспериментальнай үлэни саҕалыахха баар этэ диэн этии киллэрдэ. Бу хайысхаҕа билим эйгэтин кытыһыннаран, үлэлэһии баран эрэрин туһунан Сахаяна Павлова хоруйдаата. Онон икки сылынан бу хайысхаҕа түмүк тахсара күүтүллэр. Ол эрээри, билигин өртөөһүн бобуулааҕын бэлиэтээтэ.