Одьулууннар Бырабыыталыстыба отчуотун биһирээтилэр

Бүгүн, олунньу 26 күнүгэр, СӨ ситэриилээх былааһын отчуота Чурапчы улууһун Одьулуун нэһилиэгэр ыытылынна. Тыа хаһаайыстыбатын уонна ас-үөл бэлиитикэтин миниистирин солбуйааччы Сахаяна Павлова салайар бөлөҕүн бэрэстэбиитэллэригэр Одьулуун нэһилиэгин олохтоохторо үгүс ыйытыылары биэрдилэр.

— Үүт харчыта саас уонна сайын тоҕо хойутууруй ?

Сахаяна Павлова, тыа хаһаайыстыбатын уонна ас-үөл бэлиитикэтин миниистирин солбуйааччы хоруйдуур:
— Быйылгыттан субвенция харчыта улуустарга кэлэр буолла. Мантан инньэ xарчы кэлиитэ түргэтиэҕэ.

— Байыаннай дьайыыга көмөҕө диэн хомуллар үп-харчы тоҕо отчуоттамматый?

Чурапчы улууһун баһылыга Степан Саргыдаев хоруйдуур:

— Байыаннай дьайыы саҕаланыаҕыттан байыастарбытыгар 54 мөл. солк. үбүнэн-харчынан көмөлөстүбүт. Ол курдук, 36 мөл. солк. — улуус бүддьүөтүттэн, 14 мөл солк.— биирдиилээн дьон, успуонсардар көмөлөрө.

Ити кэннэ Одьулуун олохтоохторо санааларын кытта үллэһиннилэр, үгүс этиилэри көтөхтүлэр.

Иван Парфенов, Одьулуун олохтооҕо:

— Тыа хаһаайыстыбатыгар ити быыһыгар наһаа үчүгэй бырагыраамалар үлэлээн аастылар. Холобура, олорор дьиэни тутуу бырагыраама. Бу бырагыраама көмөтүнэн манна олорор дьиэлэр тутуллан, биһиэхэ үлэлиир оҕолорбут атын сирдэргэ баран хаалбакка, үлэлии хаалбыттара. Маннык туһалаах бырагыраама өссө үлэлээтин. Чэбдигирдии бырагыраамата эмиэ үчүгэй этэ. Билигин саҥа хотоннору тута сатыырдааҕар, өрөмүөн үлэтин ыытыахха баара.

Анатолий Ефремов, Одьулуун олохтооҕо:
— Үрэхпитин дириҥэтиини былааҥҥа ылынныбыт диэн баһылыкпыт Степан Анатольевич эттэ. Ол онно эрэнэбит.Билигин сүөһүбүтүн уулатар кыах суох буолла, ынахтарбытын хаар уутунан уулатабыт. Бу 2015 с. ууга барыыны кытта сибээстээх. Бырабыыталыстыба ыытар үлэтин биһириибин.

Иван Попов, Одьулуун олохтооҕо:
— Эдэр ыччаты тардар бырагыраамалар наадалар. Биир кэтэх ыал сүөһүтүн эстэҕинэ — саха тылбыт эстэр. Онон тыа хаһаайыстыбатын өрө тутуохха. Бэйэм үс ынахтаахпын, биир үөр сылгылаахпын. Отчуоту истэртэн олус үөрэбин. Сыл аайы кэтэһэбин.

Санаттахха, Чурапчы улууһугар Бырабыыталыстыба отчуотун бөлөҕө үс бөлөххө хайдыһан бары нэһилиэктэргэ тиийиэхтэрэ. Ол курдук, бөлөхтөрү Тыа хаһаайыстыбатын уонна аска-үөлгэ бэлиитикэтин миниистирин солбуйааччы Сахаяна Павлова, экэниэмикэ миниистирин солбуйааччы Иван Евсеев, тырааныспар уонна суол хаһаайыстыбатын миниистирин солбуйааччы Семен Коркин салайыахтара.