«ОДУНУФЕСТ-2023» — уопсастыбанньыктар түмсэр түһүлгэлэрэ

Горнай улууһугар Одунуга иккис төгүлүн ыытыллыбыт «ОДУНУФЕСТ-2023» бэстибээл өрөспүүбүлүкэ бастыҥ уопсастыбаннай түмсүүлэрин, түөлбэлэр актыбыыстарын, «СитиМ» сайдыы кииннэрин лиидэрдэрин түмтэ.

Уопсастыбаннай көҕүлээһиҥҥэ, нэһилиэктэр сайдыыларыгар киэҥ кэскиллээх кэпсэтии таҕыста.

Кэпсэтиигэ Горнай улууһун баһылыга Никита Андреев, өрөспүүбүлүкэ ыччатын министрэ Петр Шамаев, Одуну нэһилиэгин баһылыга Владимир Текеянов, «Харысхал» аһымал пуонда дириэктэрэ Любовь Клюкина, «СитиМ» өрөспүүбүлүкэтээҕи сайдыы кииннэрин салайааччыта Иван Степанов уонна Санкт- Петербургтан уопсастыбаннай түмсүүлэр кииннэрин салайааччыта Максим Никитинскэй, мустубут дьон нэһилиэктэр сайдыыларын саҥа көрүҥнэрин уонна ньымаларын дьүүллэстилэр. Ол иһигэр дьону биир сомоҕо буолууга, саҥаны айыыга санаалар, этиилр резолюцияҕа киирдилэр.

Өрөспүүбүлүкүтээҕи ТОСтар ассоциацияларын бэрэссэдээтэлэ Ксения Васильева, Бэрдьигэстээх нэһилиэгин «Үрдэл» ТОС салайааччыта Светлана Люфа, улуус кэммиэрчэскэйэ суох тэрилтэлэрэ «Росток» уопсастыбаннай тэрилтэттэн Марианна Николаева, Ангелина Бережнова, «Маленькие снегири» уопсастыбаннай тэрилтэттэн Василина Черепанова бастыҥ уопуттарын кэпсээтилэр, атын улуустары кытта сибээс олохтоотулар.

Үрдүкү салалта уопсастыбаннай үлэни, көҕүлээһини өйүүрэ бэлиэтэннэ. Нэһилиэктэри сайыннарыыга олохтоох дьону түмүү билигин бириэмэ ирдэбилэ буолла диэн кэпсэтиигэ этилиннэ.

Айталина Санникова,
бибилэтиэкэр.

Хаартыскалар Айталина Санникова, Милона Иванова түһэриилэрэ.