Офтальмология балыыһатыгар эпэрээссийэ оҥоһуллуутун билиһиннэрдилэр

Бүгүн, олунньу  6 күнүгэр, Офтальмология өрөспүүбүлүкэтээҕи балыыһатын  кылаабынай бырааһа Иван Луцкан суруналыыстары кытары үгэскэ кубулуйбут көрсүһүүтэ буолла.

Кылаабынай быраас уонна балыыһа салалтата, үлэһиттэрэ маннык көрсүһүүлэри сырыы аайы араас сонун көрүҥүнэн ыытарга кыһаллаллар. Быйылгы көрсүһүү эмиэ ураты буолла. Ол курдук, бу сырыыга катарактаҕа эпэрээссийэ  оҥоһуллуутун суруналыыстарга көрдөрдүлэр.

Бу эпэрээссийэни балыыһа кылаабынай бырааһа Иван Луцкан, СӨ үтүөлээх бырааһа, байыаннай дьайыыга элбэхтик сылдьыбыт Иннокентий Белолюбскай, реаниматолог-анестезиолог, эпэрээссийэ сиэстэрэлэрэ оҥордулар.

Эпэрээссийэ хайдах оҥоһуллара, туох уларыйыы тахсара  барыта улахан экраҥҥа көстө турда, Иван Петрович ону барытын сиһилии кэпсээн билиһиннэрдэ. Эпэрээссийэ 15 мүнүүтэ иһигэр ситиһиилээхтик оҥоһулунна.   Офтальмология балыыһатыгар маннык эпэрээссийэлэри күн аайы 50-чаҕа тиийэ оҥороллор.

Эпэрээссийэ кэнниттэн Иван Луцкан суруналыыстарга пресс-кэмпириэнсийэ оҥордо, балыыһа ситиһиилэрин кэпсээтэ уонна суруналыыстарар ыйытыыларыгар сиһилии хардарда.

Өрөспүүбүлүкэ киин да, ыраах сытар да, Арктика да улуустарыгар мобильнай быраастар тиийэн, миэстэтигэр туһалаах көмөнү оҥороллор. Офтальмология балыыһата эмиэ бу бырайыак чэрчитинэн, ыраах сытар нэһилиэнньэҕэ тиийэн, миэстэтигэр тустаах көмөнү оҥорон нэһилиэнньэ махталын ылар. Билигин өрөспүүбүлүкэ таһыгар баран эмтэнээччилэр да ахсааннара аҕыйаата.

Балыыһа инники былааннара да киэҥ. Балыыһа билиҥҥи сиригэр турар эргэ мас дьиэ көтүрүлүннэҕинэ, итиннэ аныгы тутуулаах саҥа дьиэ дьэндэйэн тахсара торумнанар. Улуустарга болҕомто эмиэ уҕараабат. Сотору кэминэн Майа сэлиэнньэтигэр Илин эҥэр улуустарыгар аналлаах офтальмология балыыһата аанын арыйыахтааҕа эмиэ былааҥҥа баар.

Иван Петровиһы өрөспүүбүлүкэттэн көһөн баран эрэрин туһунан сурах төһө оруннааҕын туһунан эмиэ ыйыттылар. Онуоха кини: “Ханна төрөөбүт сирбэр наадалаахпын. Ханна да барар санаам суох”, — диэн быһаччы хардарда.

Иван Луцкан түмүккэ суруналыыстар бэриниилээх үлэлэрин бэлиэтээн, Махтал суруктары туттарда.

Ол кэнниттэн балыыһа иһигэр тэриллибит баай ис хоһоонноох мусуойу астына көрдүбүт. Кылаабынай быраас: “Бу мусуойу биһиги бэйэбитигэр буолбакка, чуолаан эмтэнээччилэрбит  сынньаналларыгар, кинилэр көрөн билсэллэригэр аныыбыт”, — диэн чахчыта да, барыта ыарыһах туһугар туһуланар үлэлээхтэрин көрөн итэҕэйдибит.