Оҕо босуобуйатын сэтинньи бырааһынньыгын иннинэ биэриэхтэрэ

Сэтинньитээҕи бырааһынньыгынан сибээстээн, Социальнай пуонда кыраапыгынан ый саҥатыгар түһэр оҕо босуобуйатын, болдьоҕун иннинэ ыытыаҕа.

Ол курдук, төрөппүттэр сэтинньи 1 күнүгэр алтынньы ыйдааҕы бу босуобуйалары тутуохтара:

— 17-гэр диэри саастаах оҕолор биир кэлим  уонна хат дьахталлар босуобуйаларын,

— үлэлээбэт төрөппүттэргэ оҕону 1,5 сааһыгар диэри көрүү ыйдааҕы босуобуйатын,

— бастакы оҕоҕо 3 сааһыгар диэри көрүллэр ыйдааҕы босуобуйаны,

— ыҥырыынан байыаннай сулууспалаах оҕотугар көрүллэр ыйдааҕы босуобуйаны.

Баан нөҥүө харчынан ылары талбатах (безналичную выплату) дьиэ кэргэҥҥэ төлөбүрү болдьоҕун иннинэ ыытыахтара. Өскөтүн босуобуйаны буоста тириэрдэр буоллаҕына, эрэгийиэннэргэ Арассыыйа буостатын салааларын үлэтин кыраапыгар сөп түбэһиннэрэн сэтинньигэ 25-с чыыһылаҕа диэри харчы түһүөҕэ.

1,5 сааһыгар диэри оҕону көрөр ыйдааҕы төлөбүр оҥоһуллубут үлэлиир төрөппүттэр эмиэ болдьоҕун иннинэ сэтинньигэ ылыахтара. Төлөбүр үксүгэр ый 8-с чыыһылатыгар түһэр, ол эрээри, кэлэр ыйга ити субуотаҕа түбэһэр, онон төрөппүттэр босуобуйаны биир күн эрдэлээн – сэтинньи 7 күнүгэр тутуохтара.

Оҕо үс сааһыгар диэри ийэ хапытаалыттан көрүллэр ыйдааҕы төлөбүр дьиэ кэргэҥҥэ сэтинньигэ көннөрү кыраапыгынан 5-с чыыһылаҕа – бырааһынньык кэнниттэн бастакы үлэ күнүгэр киириэҕэ.

Бэлиэтээн эттэххэ, биирдиилээн субъектар эрэгийиэн сокуонугар сөп түбэһиннэрэн оҕолоох ыалларга бэйэлэрин босуобуйаларын көрөллөр. Өйөбүл бу курдук миэрэтин биэриинэн нэһилиэнньэ социальнай көмүскэлин салаалара дьарыктаналлар. Кинилэр босуобуйаны Социальнай пуонда төлүүр күнүттэн атын бэйэлэрин кыраапыктарынан ыыталлар. Бу туһунан Арассыыйа социальнай пуондатын саайтыгар суруйаллар.