Оҕо былаһааккаларын туруга хайдаҕый?

Халлаан сылыйан оҕолор кыралаан былаһааккаларга оонньуур, салгын сиир буоллулар. Хаар ууллуута уһун кыһын устата тоҥон чоҥкуһан турбут былаһааккалар оҕолор саҥаларынан туолуохтара. Оттон олор  туруктара хайдаҕый?

Харыстабыл эмиэ наада

Элбэх кыбартыыралаах дьиэ тиэргэннэригэр оҕолор оонньуур былаһааккаларын саҥардыы, тупсарыы үлэтэ син сыллата ыытыллар эрээри, олох быраҕыллан хаалбыттар эмиэ бааллар. Сорох былаһааккалар олоччу кумахха турар, сорохтор сымнаҕас көбүөрдээх буолаллар. Ситэри оҥоһуллубатах, өрөмүөннэммэтэх биир хачыал быатыттан, турник тимириттэн сылтаан оҕолор эчэйиэхтэрин сөп. Маны сэргэ, кистэл буолбатах, саҥа оҥоһуллубут былаһааккаларга харыстабыла суох сыһыан эмиэ баар. Кыра оҕо хачыалыгар хатааһылааһын, кумахха тимирдиллибит карусели хостоон таһаарыы курдук түгэннэри уруккуттан бэлиэтии көрөбүн…

Оҕо эчэйдэҕинэ…

Харыстабыла суох сыһыантан саҥа былаһааккалар эргэрэн, алдьанан бараллар. Ол түмүгэр эчэйиилэр тахсаллар. Бу соторутааҕыта Хабаровскай кыраайга түөрт саастаах кыыс оҕо оонньуур былаһааккатыгар сырылыы сылдьан тааһын уҥуоҕун өлөрбүтэ. Оҕо эчэйиитин төрүөтүнэн сырылыыр сир тэҥэ суоҕа буолбут (горка). Онон Ванино куорат борокуратуурата эмсэҕэлээбит оҕоҕо куорат дьаһалтата хоромньуну төлүөхтээҕин туһунан суукка ирдэбил түһэрбит. Куорат суутун уурааҕынан, эмсэҕэлээбит оҕоҕо дьаһалта 25 тыһ. солк. хоромньу төлүөхтээх.

Тааҥкаҕа тахсыбыт иэдээн

Аҕыйах сыллааҕыта Дьокуускай куорат ДСК оройуонугар көтүллэн баран ситэри хомуллубакка ордон хаалбыт болкуон бетонугар баттатан оҕо суорума суолламмыта, хас да оҕо эчэйии ылбыта. Бу соторутааҕыта түмэл тиэргэнигэр эcпэнээт-тааҥка иһигэр тимир төлө баран, 16 cаастаах оҕо олохтон туораата… Оттон эчэйиилээх, онно-манна баттатыылаах түгэннэр күннээҕинэн умнуллан хаалаллар. Хомойуох иһин, киһи эчэйиилээх эбэтэр өлүүлээх эрэ түгэн кэнниттэн тустаах бэрэбиэркэ тиийэр.

Оҕо өлүүлээх иэдээн кэнниттэн СӨ борокуратуурата бэрэбиэркэ үлэтин саҕалаабыта. Оттон Силиэстийэлиир кэмитиэт сэрэҕэ суохтан өлүү тахсыбытынан “Сэрэҕэ суох буолууттан киһини өлүүгэ тиэрдии” диэн РФ Холуобунай кодексатын 109 ыст. 1 ч. холуобунай дьыаланы тэрийбитэ. Оҕо өлүүлээх быһылаан тохсунньу 20 күнүгэр “Россия — моя история” паарка тааҥкатыгар тахсыбыта. Ылбыт эчэйиилэриттэн оҕо суорума суолламмыта…

Биһиги былаһааккаларбыт хайдахтарый?

Оҕолору эчэйиигэ тиэрдэр тэрилинэн оҕо оонньуур былаһааккатыгар тирэҕэ суох турар футбол боруотата буолуон сөп. Ол курдук, дойду үрдүнэн бүтэһик биэс сыл иһигэр маннык боруотаҕа эчэйэн 19 киһи өлбүт. Дойду “Норуодунай фрона” кэтээн көрүүтүн түмүгүнэн, оҕо оонньуур былаһааккаларыгар 70% ирдэбили кэһии баара биллибит. Оттон юристар бэлиэтииллэринэн, оҕо оонньуур былаһааккаларын туруктарын дьиэни көрөр-истэр, салайар хампаанньалар эбэтэр ити оройуоҥҥа сыһыарыылаах дьаһалта бэрэбиэркэлиэхтээх эбит.

“Оҕо оонньуур былаһаакката чааһынай киһи бас билиитигэр киирэр буоллаҕына, оҕо эчэйэр түгэнигэр, эппиэтинэһи кини сүгэр. Өскөтүн, былаһаакка элбэх кыбартыыралаах дьиэ тиэргэнигэр турар буоллаҕына, эппиэтинэһэ салайар хампаанньаҕа эбэтэр ТСЖ-га. Былаһаакка куорат иһигэр, ханнык да дьиэҕэ сыһыарыыта суох буоллаҕына, эппиэтинэһи куорат дьаһалтата сүгэр”, — диэн юрист Татьяна Константинова быһаарар.

Ол эрээри, арай кыра саастаах оҕо улахан оҕолор хачыалларыгар, турниктарыгар тахсан охтон эчэйиини ылар түгэнигэр, эппиэтинэһэ төрөппүккэ буолар. Тоҕо диэтэххэ, былаһаакка иһигэр алдьаныы, быа, тимир, сыап быһа барыыта эрэ баар буоллаҕына, былаһааккаҕа сыһыарыылаах тэрилтэ эппиэттиир.

Матросов аатынан уулуссаҕа

Дьокуускай куорат Аппа уҥуор оройуонугар баар Матросов аатынан уулуссаҕа эргэрэн хаалбыт оҕо былаһаакката баар. Сааһын бу тулата барыта уу-хаар, бадараан буолар. Ону ол диэбэккэ, чугастааҕы оҕолор кэлэн хото оонньууллар. Дьокуускай куорат борокуратуурата бу былаһаакка ханнык дьиэҕэ сыстарын быһааран, эмэҕирэн субу сууллуохча турар былаһааккаҕа оҕолор эчэйиэхтэрин сөбүнэн бэрэбиэркэ оҥорбута. Алдьаммыт хачыал, быһах биитин курдук сытыы кырыылаах сырылыыр сир, дьэбиннирбит уонна эмэҕирбит былаһаакка күн бүгүнүгэр диэри көтүрүллүбэккэ турар. Билигин Дьокуускай үрдүнэн маннык туруктаах былаһааккалар аҕыйаҕа суохтар.

Арассыыйаҕа уопсайа ааспыт сыл түмүгүнэн, 2 тыһыынчаттан тахса оҕо эчэйиэн сөптөөх сэрэхтээх, ким да көрүүтүгэр киирбэт былаһааккалар 54 эрэгийиэҥҥэ бааллар. Дьокуускайга билигин маннык көрүүтэ-харайыыта суох былаһаакка ахсаана 367 тэҥнэһэр.

Сотору кэминэн Дьокуускайга төгүрүк сыл устата үлэлиир оҕо былаһааккалара баар буолуохтарын сөп. Быйыл Таалай күөл таһыгар 2012 сыллаахха үлэҕэ киирбит “Водянова” диэнинэн биллэр-көстөр оҕо оонньуур былаһаакката саҥардыллыахтаах. Табылыннаҕына, былаһаакка аҥаара сылаас буолуохтаах.

Дьокуускай куорат-тааҕы сири-уоту кытта үлэҕэ департаменын пресс-сулууспата:

— Кэлиҥҥи сылларга оҕо оонньуур, успуорт воркаут-былаһааккаларын тупсарыыга, саҥардыыга үлэлэр ыытылыннылар. Ааспыт сыл саҕаланыыта маннык эбийиэктэр уопсай ахсааннара 643‑кэ тэҥнэспитэ. Онтон 367 былаһаакка хаарбах туруктааҕынан билиниллибитэ. 2024–2025 сылларга сүрүн болҕомтону элбэх кыбартыыралаах дьиэлэр тиэргэннэрин көрүүгэ, бэрэбиэркэлээһиҥҥэ уурбуппут. Бу сирдэр уопсай дьиэ олохтоохторун бас билиилэрэ буолаллар. Онон тиэргэни тупсарыы боппуруоһа олохтоохтор интэриэстэригэр буолар. Былаһаакка оҥоһуллан, саҥардыллан баран дьиэни көрөр-истэр салайар хампаанньа көрүүтүгэр барар. Бу сылга сүрүн болҕомто оҕолор оонньуур былаһааккаларын салайар хампаанньаларга биэрэргэ ууруллуоҕа. Билиҥҥитэ 212 былаһаакка бэрилиннэ, өссө 64 эбийиэк муниципалитет иһинэн сылдьар. Онон бу сылга куоракка баар оҕо оонньуур былаһааккалара бүтүннүү Дьокуускай дьаһалтатын бас билиититтэн тахсыахтара.

Дьокуускай куорат-тааҕы сири-уоту кытта үлэҕэ департамент:

— Кэлиҥҥи сылларга оҕо оонньуур, успуорт воркаут-былаһааккаларын тупсарыыга, саҥардыыга үлэлэр ыытылыннылар. Ааспыт сыл саҕаланыыта маннык эбийиэктэр уопсай ахсааннара 643‑кэ тэҥнэспитэ. Онтон 367 былаһаакка хаарбах туруктааҕынан билиниллибитэ. 2024–2025 сылларга сүрүн болҕомтону элбэх кыбартыыралаах дьиэлэр тиэргэннэрин көрүүгэ, бэрэбиэркэлээһиҥҥэ уурбуппут. Бу сирдэр уопсай дьиэ олохтоохторун бас билиилэрэ буолаллар. Онон тиэргэни тупсарыы боппуруоһа олохтоохтор интэриэстэригэр буолар. Былаһаакка оҥоһуллан, саҥардыллан баран дьиэни көрөр-истэр салайар хампаанньа көрүүтүгэр барар. Бу сылга сүрүн болҕомто оҕолор оонньуур былаһааккаларын салайар хампаанньаларга биэрэргэ ууруллуоҕа. Билиҥҥитэ 212 былаһаакка бэрилиннэ, өссө 64 эбийиэк муниципалитет иһинэн сылдьар. Онон бу сылга куоракка баар оҕо оонньуур былаһааккалара бүтүннүү Дьокуускай дьаһалтатын бас билиититтэн тахсыахтара.