Хаартыска: Мария Васильева, СИА
Ил Түмэн алтыс (уочараттаах) пленарнай мунньаҕар муус устар 23 күнүгэр «Саха Өрөспүүбүлүкэтин оҕо быраабыгар боломуочунай 2023 сыллааҕы үлэтин туһунан дакылаат туһунан» уураах ылылынна.
Быһаарыы сурукка этиллибитинэн, Саха Өрөспүүбүлүкэтигэр сокуоннай саастарын ситэ илик оҕолор бырааптарын, көҥүллэрин уонна сокуонунан көрүллүбүт интэриэстэрин судаарыстыба өттүттэн көмүскээһиҥҥэ мэктиэлэри хааччыйар, сокуоннай саастарын ситэ илик оҕолор сокуонунан көрүллүбүт бырааптарын уонна интэриэстэрин олоххо киллэрэр, кинилэр бырааптарын кэһии чахчыларын, оҕолорго хаҕыс сыһыаны туоратар, ону арыйар тиһиги тупсарар уонна сокуоннай саастарын ситэ илик оҕолорго куттал суох буолуутун хааччыйар инниттэн боломуочунай Саха Өрөспүүбүлүкэтин Ил Түмэнигэр маннык этиилэри киллэрэр наадатын ыйар:
‒ Саха Өрөспүүбүлүкэтин 695 II нүөмэрдээх муус устар 25 күнүгэр ылыллыбыт «Саастарын ситэ иликтэр дьыалаларыгар уонна кинилэр бырааптарын көмүскээһиҥҥэ хамыыһыйалар тустарынан» сокуонугар эбиилэри, көҕүрэтиилэри киллэрэр муниципальнай оройуоннарга уонна куораттааҕы уокуруктарга оҕо быраабын көмүскүүр исписэлиистэри элбэтэр боппуруоһу көрөргө;
‒ Тулаайах, көрүүтэ-харайыыта суох хаалбыт оҕолорго норуот дьокутааттарын иһиттэн настаабынньыктааһыны тэрийэр боппуруоһу көрөргө.
Саха Өрөспүүбүлүкэтин норуодунай дьокутаата Наталья Сидоркина Саха Өрөспүүбүлүкэтигэр оҕолор дэгиттэр куттала суох буолууларын стратегиятын оҥоруу хаһан түмүктэнэрин ыйытта. Саха Өрөспүүбүлүкэтигэр оҕо быраабыгар боломуочунай Туйаара Васильева эппитинэн, бу үлэ 2024 сыл устата оҥоһуллан бүтүөхтээх.
Ил Түмэн социальнай бэлиитикэҕэ, үлэҕэ уонна дьарыктаах буолууга сис кэмитиэтин бэрэссэдээтэлэ Алена Атласова: «Саха Өрөспүүбүлүкэтин оҕо быраабыгар боломуочунай 2023 сыллааҕы үлэтин туһунан дакылаат муус устар 17 күнүгэр сис кэмитиэт мунньаҕар көрүллүбүтэ. Онон уурааҕы ылынарга этии киллэрэбин», – диэтэ. Өрөспүүбүлүкэ норуодунай дьокутааттара куоластааһын түмүгүнэн уурааҕы ылыннылар. Бу туһунан Ил Түмэн пресс-сулууспата иһитиннэрдэ.
Мария Васильева, СИА хаартыската
Сунтаар Кэмпэндээйитигэр котлованнай ньыманан элбэх кыбартыыралаах дьиэ тутуута саҕаланна. Бу туһунан улуус дьаһалтатын пресс-сулууспата иһитиннэрдэ.…
Бэйэтин уруккутун сыаналыыр, ытыктыыр нэһилиэк кэскиллээх. Харбалаахтааҕы үөрэхтээһин холбоһугар быйыл кыһын оскуола түмэлин архыыбын матырыйаалын…
Харбиҥҥа Арассыыйа-Кытай VIII Экспо чэрчитинэн, Саха Өрөспүүбүлүкэтин бырабыыталыстыбатын бэрэссэдээтэлин бастакы солбуйааччы Дьулустаан Борисов Beijing Jianlong…
Нам улууһун территориятыгар ыксаллаах быһыы-майгы эрэсиимэ биллэрилиннэ. Бу туһунан улуус дьаһалтатын пресс-сулууспата иһитиннэрдэ. Бүгүн, ыам…
Сааскы кустааһын сезона саҕаланыаҕыттан, хомойуох иһин, өрөспүүбүлүкэҕэ киһи өлүүлээх хас да түбэлтэ таҕыста. СӨ…
Саха сирэ Кытай Норуодунай Өрөспүүбүлүкэтин Цзянси провинциятын кытары доҕордуу сибээс туһунан Сөбүлэһии түһэристэ. Арассыыйа -…