Оҕо дьиэтин дьиҥнээх доҕоро этэ

Өймөкөөн улууһугар 1992 с. бастакы баһылыгынан Трифонов Анатолий Георгиевич ананан кэлбитэ. Депутатскай ГОК сүрүн инженеринэн үлэлии сылдьыбыта. Ол иннинэ Өймөкөөҥҥө Нелькан диэн бириискэҕэ көмүс хостооһунугар горняктаабыта. Аҕата Георгий Васильевич сэрии сылларыгар Амма Абаҕатыгар оҕо дьиэтигэр дириэктэринэн, ийэтэ Татьяна Павловна асчытынан үлэлээбиттэрин туһунан кэпсиирэ. Кырачаан Толя тулаайах оҕолору кытта тэҥҥэ улааппыта. Төрөппүттэринэн киэн туттара.

Анатолий Георгиевич кэлиэҕиттэн, Уус-Ньаратааҕы оҕо дьиэтин үлэтэ биллэ чэпчээбитэ, олохпут олох атын хайысхаламмыта. Араас тэрилтэлэр салайааччыларын, үлэһиттэрин — 300‑тэн тахса киһини түмэн, «Ассоциация друзей детей-сирот “Саха-СОС-Киндердорф” диэн түмсүүнү завуч А. В. Лобунецтыын тэрийбитэ. Бэйэтэ ассоциация бэрэсидьиэнинэн талыллыбыта. 1995 с. оҕо дьиэтигэр «Усть-Нерский семейный детский дом» диэн ааты иҥэрбитэ.

1990–1992 сс. оҕо дьиэтигэр барыта 10 дьиэ кэргэни тэрийбиппит, 126 тулаайах оҕо баара. Шефтэр көмөлөрүнэн кыбартыыра курдук тупсаран оҥорбуппут, дьиэ тээбириннэрин, бытовой тиэхиньикэ арааһа баар буолбута. Москваттан 20 туонналаах контейнерынан тиэйэн аҕалан, үөрүү-көтүү муҥура суоҕа. Дойдуга ыарахан балаһыанньа буолбутун тулаайах оҕолорбут олох билбэккэ аһарбыттара. Биир ыалга кэргэнниилэр үлэлииллэрин ситиһэн, дьиҥнээх дьиэ кэргэн балаһыанньатын үлэбитигэр киллэрбиппит.

Сайын аайы, 1994 сылга диэри Николаев куоракка (Украина) «Якутия» ЛТО тэринэн, оҕолору атырдьах ыйа бүтүөр диэри илдьэн, сопхуоска, оҕуруокка үлэлэтэн, сынньатан, доруобуйаларын муора салгыныгар тупсаран, билиилэрин кэҥэтэн, араас куораттары кэритэн аҕаларбыт. Онно барытыгар шефтэр, попечителлэр ассоциация нөҥүө үбүнэн көмөлөһөллөрө.

Сэбиэскэй Сойуус ыһыллыбытын да кэннэ быыһы-хайаҕаһы булан, оҕолорбут сайыҥҥы сынньалаҥнарын тэрийэрбит. Шефтэрбит, учууталлар бэйэлэрин кытта 1–2 оҕону уоппускаҕа илдьэ бараллара. Сорох оҕолору иитээччилэрэ Белоруссияҕа, Казахстаҥҥа, Бурятияҕа, Ставропольскай кыраайга тиийэ сынньатан, бэйэлэрин дьиэлэригэр-уоттарыгар, аймахтарыгар сырытыннаран, оҕолор дэлби сөтүөлээн, сирэйдэрэ сырдаан кэлэллэрэ.

Сорох оҕолор манна Үчүгэй, Томтор, Муома диэки ыалларга каникулларын атаараллара. Таба ыстаадаларыгар, кыыл пиэрмэлэригэр, геологтары кытта бириискэлэргэ, старательскай артыалларга көмүс хостооһунугар үлэлээн, ыкса күһүн улаатан, үлэҕэ-хамнаска эриллэн, сирэлийэн-бурулуйан төннөллөрө. Оҕолорбут киэҥ сирдэринэн тэлэһийэн, ыалларга олорон, өйдөрө-санаалара уларыйан, олоххо тардыһыылара күүһүрбүтэ — ол Анатолий Георгиевич тус кыайыыта!

Анатолий Георгиевич, Октябрина Егоровна шефтэһэр оҕолорун туох баар кыһалҕаларын барытын билэ-көмөлөһө сылдьаллара. Ол курдук, Саша атаҕа мөлтөх этэ, ону куоракка аҕалан, бэйэлэрэ көтөҕө сылдьан, эпэрээссийэлэппиттэрэ. Обургу оҕолору бөһүөлэк тэрилтэлэригэр үлэҕэ ыллаттарара: сэкирэтээр, остуорас дуоһунастарыгар. Оччолорго саҥа көмпүүтэр үөдүйэр кэмигэр оҕолорго ылан биэрэн, түргэнник баһылаабыттара. Кэлин ол оҕолортон системнэй администратордар, үөрэх салаатын отделларын үлэһиттэрэ тахсыбыттара. Оҕолор Трифоновтарга ыалдьыттыылларын наһаа сөбүлүүллэрэ, куоракка көспүттэригэр, устудьуоннар хонор, олорор этилэр.

Анатолий Георгиевич тулаайах оҕолор дьиэлэрин-уоттарын бэйэтэ быһаарара, онон үгүс выпускниктар ускул-тэскил барбакка, улууска олохсуйбуттара. Хас аармыйаҕа барар уолу атаарара, көрсөрө, көмөлөһөрө. Кини шефтэһэр уола Александр Свинин 1994 сыллаахха Чечня сэриитигэр кыттыбыта, бүтүн дьиэнэн киниэхэ анаан баһыылка хомуйарбыт. Анатолий Георгиевич дьиҥ аҕалыы кыһамньытынан этэҥҥэ эргиллэн кэлбитэ. Саша алта бииргэ төрөөбүттэр улахан убайдара этэ. Кэргэннэммитигэр, сыбаайба тэрийбитэ, эдэр ыалга саҥа дьиэ бэлэхтээбитэ. Балтылара Татьяна, Наталья, Евгения үрдүк үөрэхтэммиттэрэ.

Бэйэтин дьиэ кэргэнин (түөрт оҕолоохтор) кытта оҕо дьиэтин иитиллээччилэрин илдьэ айылҕаҕа тахсыһара, үөрэтэрэ-такайара. Сабыллыбыт «Детский мир» маҕаһыын дьиэтин оҕо дьиэтигэр бэрдэрбитэ. Онно «Ровесник” култуурунай-чэбдигирдэр киини тэрийбиппит (иистэнэр, маһынан уһанар мастарыскыайдаах, киэҥ-куоҥ бибилэтиэкэлээх, ат эккирэтэр тренажернай, аактабай саалалардаах, үрдүк сыаналаах). Ол кииҥҥэ биһиги эрэ буолбакка, бөһүөлэк оҕолоро, ыччаттара эмиэ дьарыктаналлара.

Анатолий Георгиевич таһаарыылаах үлэтэ үрдүктүк сыаналаммыта: “За трудовую доблесть” мэтээлинэн, “СӨ үтүөлээх горняга”, “За дела Милосердия” Сибэтиэй царевич Димитрий уордьанынан наҕараадаламмыта, Өймөкөөн улууһун Бочуоттаах олохтооҕо.

Муус устар 21 күнүгэр Анатолий Георгиевич Трифонов 74 сааһыгар ыарахан ыарыыттан биһиги кэккэбититтэн туораата. Үтүө киһи аата умнуллубат! Кинини кытта бииргэ алтыһан үлэлээбиппинэн киэн туттабын.

Людмила Ильинична Неустроева, 1983–2023 сс. оҕо дьиэтин иитээччитэ, дириэктэрэ.