СҮБЭҺИТ: Оҕо эмоциональнай интеллегин хайдах үрдэтэбит?

Оҕо эмоциональнай интеллегин үрдэтии үлэтэ кыра сааһыттан саҕаланыахтаах. Арассыыйаҕа биллэр оҕо бырааһа Виктор Краснов бэлиэтииринэн, эмоциональнай интеллегэ сайдыбатах оҕо улаатар сааһыгар ыарахаттары көрсөр.

Дьону кытта уопсай тылы буларыгар, доҕоттордоноругар эрэйи көрүөн сөп. Ону сэргэ бу интеллегэ сайдыбатах оҕо санаатын сатаан сайа эппэт, дьон иннигэр саҥарарыттан кыбыстар, муҥкук буолар эбит.

Онон оҕо үс-түөрт сааһыттан төрөппүттэр муусука араас көрүҥүн кыра-кыралаан иһитиннэриэхтээхтэр уонна ону уруһуйдаталлар. Уруһуй ис хоһоонун буолбакка, бу муусуканы иһиттэҕинэ киниэхэ туох санаа, хайдах настырыанньа киирэрин уруһуйдуохтаах эбит. Оччотугар оҕо кыра сааһыттан санаатын сайа этэр, аһаҕас, тулалыыр эйгэни кытта эйэлээх сыһыаны олохтуу үөрэнэр.