Оҕо этигэр-сиинигэр D битэмиин төһө элбэҕин босхо бэрэбиэркэлииргэ этии көтөхтүлэр

Хата бу бэрт этии буолбут. Билигин киһиэхэ ханнык битэмиин тиийбэтин бэрэбиэркэлэтээри дьон хастыы да тыһыынчаны барыыр. Көннөрү нэһилиэнньэ хас биирдии оҕотугар маны уйунар кыаҕа суох. Дьэ ол иһин, арааһа, бу битэмииним тиийбэт быһыылаах диэн сабаҕалаан көрөн бэйэтэ эмтиэкэлэнэр киһи элбээтэ.

Судаарыстыбаннай Дуума вице-спикерэ Борис Чернышов D битэмиин оҕо этигэр-сиинигэр төһө элбэҕин босхо бэрэбиэркэлииргэ уонна салгыы эминэн-томунан эбэтэр эмтиир сыаллаах БАДнан хааччыйарга этии көтөхпүт. Ити туһунан Чернышов Арассыыйа Доруобуйатын харыстабылын миниистирэ Михаил Мурашкоҕа суругар этиллэр диэн “Газета.Ru” суруйар.

Чернышов этэринэн, Арассыыйа нэһилиэнньэтин ортотугар D битэмиин тиийбэтэ бүтүн омук (нация) доруобуйатыгар, ордук үүнэр көлүөнэҕэ улахан кутталааҕын бэлиэтиир.

“Биһиги дойдубут үгүс өттө күн үчүгэйдик көрбөт сиригэр баар. Онон күһүнтэн сааска диэри D сөптөөх битэмиинэ ылыллыбат. Дьиҥэр, D битэмиин минеральнай атастаһыыга эрэ буолбакка, иммунитекка, сүрэх-тымыр, ууһуур систиэмэ үлэтэ кэһиллиитин, инфекционнай ыарыылары эрдэттэн сэрэтэргэ улахан оруоллаах” – диэн Чернышов ыйбыт.

Судаарыстыбаннай Дуума вице-спикерэ бэлиэтээбитинэн, Арассыыйа үрдүнэн чинчийиини ааспыт дьонтон 51% D битэмиин тиийбэтэ көстүбүт. Маныаха кэлиҥҥи үс сылга балаһыанньа соччото суох, ордук эмсэҕэлиир бөлөххө сокуоннай саастарын туола илик оҕолор киирэллэр. Ити туһунан “ГазетаRu” суруйар.