Оҕо көмүскэлин күнүгэр саҥа кинигэ сүрэхтэннэ

Бэс ыйын 1 күнэ – аан дойдуга оҕо көмүскэлин күнэ. Бу бэлиэ күн чэрчитинэн Саха сирин суруйааччыларын сойууһа «Тоотой үтүөҕэ үөрэнэр» диэн сабыс-саҥа буруолуу сылдьар кыра оҕолорго аналлаах кэпсээннэр уонна остуоруйалар хомуурунньуктарын сүрэхтиир тэрээһини Оҕо арыллар уонна ааҕар киинигэр (Детская точка кипения) ыытта.

Бу кинигэ ааптарынан Уус Алдан улууһун Өлтөх нэһилиэгин олохтооҕо, биэс оҕолоох улахан дьиэ кэргэн күн күбэй ийэтэ, Бэйдиҥэ оскуолатын саха тылын уонна литературатын учуутала, Саха сирин суруйааччыларын сойууһун Эдэр литератордарын сүбэтин чилиэнэ Анна Колосова буолар. Кини 2018 сыллаахха буолбут Эдэр суруйааччылар XXI өрөспүүбүлүкэтээҕи сүбэ мунньахтарын оҕо литературатын секциятыгар кыттыаҕыттан тэрийээччилэр харахтарын далыгар киирбитэ. Оҕо литературатын курдук уустук хайысхаҕа дьоҕоонноох ааптары эһиилигэр Суоттутааҕы айар маастарыстыба өрөспүүбүлүкэтээҕи семинарыгар ыҥырбыттара. Бу кэмтэн ыла айар үлэҕэ тардыстар элбэх оҕолоох ийэ быыс булан эдэр суруйааччылар сүбэ мунньахтарыгар, семинардарыгар кыттар үгэстэммитэ. Айымньылара ырытыллан бастаан «Чолбон» сурунаалга, онтон 2021 сыллаахха Саха сирин суруйааччыларын сойууһа таһаарбыт «XXI үйэ сүүрбэ биир эдэр суруйааччыта» хомуурунньукка бэчээттэнэн ааҕааччы киэҥ араҥатыгар тиийэн бараллар. XXIII өрөспүүбүлүкэтээҕи сүбэ мунньах түмүгүнэн Анна оҕо литературатын секциятыгар бэлиэтэнэн кинигэ таһаарарга мэктиэлэммитэ.

Кинигэ сүрэхтэниитэ Саха сирин суруйааччыларын сойууһун бэрэссэдээтэлэ Гаврил Андросов оҕо литературатын туһунан суолтатын уонна кэскилин туһунан анаарыылаах эҕэрдэ тылыттан саҕаланна. Ааптары норуот суруйааччыта Сэмэн Тумат, Амма Аччыгыйа аатынан оҕо литературатыгар Ил Дархан бириэмийэтин лауреата Евдокия Иринцеева-Огдо, иллюстратор худуоһунньук Татьяна Неустроева айар үлэҕэ алҕаатылар. Ол иһигэр сахалыы оҕо литературатын тэбэр сүрэҕэ буолан ааспыт «Чуораанчык» сурунаалга үлэлээбит суруйааччылар Альбина Борисова уонна Умсуура этиилэрэ ыалдьыттар болҕомтолорун тарта. Умсуура: «Оҕо литературата диэн хара үлэ. Ол эйгэҕэ элбэх оҕолооҕуҥ курдук элбэх кинигэлэн», онтон Альбина Андриановна: «Саха литературатыгар оҕо суруйааччыта төрөөбүтүнэн эҕэрдэлиибин! Анна – билиҥҥи кэмҥэ кыра саастаах оҕолорго суруйар бастыҥ ааптар» диэн дьоһун бэлиэтээһиннэри оҥордулар.

Анна Колосованы саҥа кинигэтэ тахсыбытынан ийэтэ, балтыта, Эдэр литератордар сүбэлэриттэн үөлээннээхтэрэ, учууталлара, үөрэнээччилэрэ, биир дойдулаахтара, аймах-билэ дьонноро, бииргэ үөрэммит уонна үлэлиир доҕотторо эҕэрдэлээтилэр.

«Тоотой үтүөҕэ үөрэнэр» диэн кыра оҕолорго аналлаах кэпсээннэр уонна остуоруйалар хомуурунньуктара «Алта» кинигэ кыһатыгар «Саха сирин суруйааччыта» ассоциация үбүлээһининэн, 300 ахсаанынан бэчээттэнэн таҕыста. Кинигэни ойуутун «Айыы кыһата» национальнай гимназия учуутала Сардаана Нелтановаҕа дьарыктыыр оҕолоро – 7-с кылаас үөрэнээччилэрэ Сахамин Торговкин, Милена Стручкова, Динара Иванова, Настя Потапова уонна 3-стэн Настя Нелтанова оҥордулар. Манна даҕатан аҕыннахха, ойууһут дьоҕура уһуктубут Сахамин Торговкин айар быыстапката кинигэ сүрэхтэниитин киэргэттэ, кини үлэлэрэ дойду уонна өрөспүүбүлүкэ таһымнаах күрэстэргэ ситиһиилээхтик кытталлар эбит.

Бу тэрээһини бэрт сэргэхтик ыыппыт «Алта» кинигэ кыһатын салайааччы, поэт Зинаида Архипова эдэр ойууһуттары болҕомтоҕо ылбытын, салгыы бииргэ үлэлэһэр санаалааҕын үллэһиннэ. Оттон кыһыл лентанан баайыллыбыт саҥа кинигэни арыйыы сиэрин-туомун кэннэ үс экземпляр Оҕо арыллар уонна ааҕар киинин долбууругар ууруллан ааҕааччытын кэтэһэ хаалла. «Тоотой үтүөҕэ үөрэнэр» кинигэни кэрэхсээбит, оҕолор ылыахтарын баҕарар дьон үлэ кэмигэр Ярославскай уулусса 20 №-дээх дьиэтин 303 хоһуттан ыйыталаһыаххытын сөп.

Саха сирин суруйааччыларын сойууһун пресс-киинэ.