«Оҕо куйуурдуу турара» истипиэндьийэни туттардылар

Сэтинньи 11 күнүгэр, Ойуунускай төрөөбүт күнүгэр, кини аатын сүгэр Литература түмэлигэр тэрээһиннэр буоллулар.

«Оҕо куйуурдуу турара» боруонсаттан кутуллубут скульптуралар бэйиэт төрөөбүт Халамнаайы алааһыгар уонна кини аатын сүгэр Литература түмэлигэр тураллар.
«Оҕо куйуурдуу турара» пуонда тэриллэн, устудьуон оҕолорго сыллата истипиэндьийэни туттараллар.
Егор Егорович Борисов, мэдиссиинэ билимин дуоктара, пуонданы тэрийээччи:
— Быйыл ахсыс төгүлүн истипиэндьийэбитин туттарабыт. Сыллата уон оҕоҕо уоннуу тыһыынча солкуобайы туттарабыт. Бу үлэбит сыала-соруга — улуу Ойуунускай аатын үйэтитии уонна оҕолор аартыктарын арыйан, кинилэри өйөөһүн буолар. Ойуунускай дойдутуттан алгыстаммыт истипиэндьийэни устудьуон оҕолорго туттарарбытыгар Былатыан Ойуунускай аатын ааттатар, бу куйуурдуу турар оҕо курдук дьулуурдаах, сырдыкка тардыһыылаах, үчүгэй үөрэхтээх, үлэлээх, үтүө дьон буолуҥ диэн эбээһинэстиибит, — диэн эттэ.

Чөркөөх нэһилиэгин дьаһалтатын, түмэлин аатыттан, Егор Егоровичка махталларын тиэртилэр.

Санатар буоллахха, бу истипиэндьийэни Егор Борисов уонна кини дьиэ кэргэнэ тэрийэн, туттараллар.