«Оҕо куйуурдуу турара» мэҥэ өйдөбүнньүк бэлиэ сирин ыраастаатылар

«Төрөөбүт дойдуҥ хантан саҕаланарый» диэн ырыа хомоҕой тылларыгар этиллэринии хас биирдии киһи сүрэҕэр төрөөбүт сирэ —  кини оҕо сылдьан сүүрбүт-көппүт ыллыгыттан саҕаланар.

Бу ыллыктар киэҥ аартыкка түмүллэн, бүтүн дойдубут араас норуоттарын сомоҕолуур Арассыыйа Федерацията буолабыт. Бүгүн дойдубут бэлиэ күнэ.

Бу күн чэрчитинэн П.А. Ойуунускай аатынан Судаарыстыбаннас түмэл уонна  улуустааҕы «Бастыҥнар хамсааһыннарын” лиидэрдэрэ бииргэ үлэлииргэ сөбүлэҥ түһэристилэр.

Бииргэ үлэлииргэ кэпсэтии эрдэ бу күһүн саҕаламмыта. Улуустааҕы  «Сатабыл» оҕо айымньытын дьиэтин педагог-тэрийээччитэ, Таатта улууһун «Үрдэл» биир сомоҕо оҕо хамсааһынын куратора М.Д. Алексеева уонна улууска «Бастакылар» оҕо хамсааһынын салайааччыта Р.С. Унарова, «Бастыҥнар хамсааһыннарын” лиидэрдэрэ Былатыан Ойуунускай төрөөбүт күнүн тэрээһинигэр кэлэн кыттан, санааларын сайа эппиттэрэ, улууспут биир историческай суолталаах бэлиэ сирин көрөргө-харайарга ылсар баҕалаахтарын биллэрбиттэрэ.

Арассыыйа күнүн көрсө кыттыгас  тэрээһиммит улууспут биир бэлиэ сириттэн — Саппыйа алаастан саҕаланна. Икки сыллааҕыта улуус ытык-мааны бэтэрээнэ, Чөркөөх түмэлин салайбыт Н.Е. Попов хас да сыллаах туруорсуутунан Мойуор Кулаковскай балаҕана сөргүтүллүбүтэ. Онон бу киэҥ-куоҥ, сөрүүн балаҕаҥҥа оҕолору кытары көрсүһүү саҕаламмыта. Мойуор Кулаковскай көмүлүөк оһоҕо оттуллан, тэрээһин сылаас сыһыанын эргиччи олохтообута. Түмэл сэбиэдиссэйэ Михаил Аржаков бу алаас, Мойуор Кулаковскай балаҕана историческай суолтатын, мантан чугас кыра  Былатыан күн сирин көрбүтүн, бу эргин сүүрэн-көтөн орох тэппитин, сөтүөлээбит, куйуурдаабыт күөлэ Халамнаайы чугаһын кэпсээтэ.

“Дойдубутугар оҕолору түмэр “Бастакылар хамсааһыннара” урукку пионерскай тэрилтэ үтүө өрүттэрин ылан тэрилиннэ. Араас тэрээһиннэргэ, хамсааһыннарга кыттан үлэтин көрдөрөр. Саха сирин Бастакы Бэрэсидьиэнэ Михаил Николаев “Былатыан барытыгар бастакы этэ” диэн эппитэ. Эһиги – “Бастакылар хамсааһыннара” — Былатыан Ойуунускайы кытары сыһыаннаах бэлиэ сири шефствоҕа ылбыккыт бэйэтэ туспа символическай көстүү. Онон кытаатан төрөөбүт дойдубутугар  үйэ-саас хаалар гына айан-тутан, үлэлээн ааспыт дьоммутун үөрэтиҥ, сыаналааҥ», — диэн эттэ.

Салгыы Михаил Аржаков уонна улууспут “Бастакылар  хамсааһыннарын” лиидэрэ Инна Максимова бииргэ үлэлиир сөбүлэҥҥэ илии баттаатылар. Бу күн оҕолор шефствоҕа ылбыт,  кыракый Былатыаны билии-көрүү аартыгар үүннэрбит, буһан-хатан тахсарыгар кынаттаабыт Халамнаайы күөлэ ураты суолталааҕын көрдөрөр  «Оҕо куйуурдуу турара» мэҥэ өйдөбүнньүк бэлиэ сирин ыраастаатылар, бэсиэдкэтин кырааскалаатылар.

С.Халгаева.