Олох очурдара: Оҕо кута

Иралаах уоллара быйыл алын кылааһы бүтэрдэ. Дьон иитиэх диэтэхтэринэ, Ира өһүргэниэх курдук. Ол эрээри, хас биирдии киһи айаҕын бүөлээбэккин дииллэринии, мөккүһэ барбат, көннөрү истэн эрэ кэбиһэр. Арай, ол күн Сандалы көрбөтөх буоллуннар…

Умнуллубат кэрэ кэм

Ира киин улуустан төрүттээх. Уһун, көнө уҥуохтаах, сырдык хааннаах, субуллар уһун суһуохтаах кыыһы элбэх уол сөбүлүүрэ, көрөрө. Ону кыыс бэйэтэ да билэрэ эрээри, үөрэҕэр, олимпиадаларга бэлэмнэнииттэн, тэрээһиннэргэ кыттартан быыс булбата.

Оскуолатын үрүҥ көмүһүнэн бүтэрбит кыыс тута экэнэмиис идэтигэр киирбитэ. Ийэтин тылыттан тахса үөрэммэтэх кыыс бастакы кууруска биирдэ-иккитэ эрэ киинэҕэ сылдьыбыта уонна иллэҥ кэмин өрүү бибилэтиэкэҕэ атаарара. Сааһыра барбыт үлэһиттэр бары билэллэрэ.

Биир үтүө күн оҕо дьиэтигэр тиийэн, кырачаан уолу таптыы көрбүттэрэ. Ийэтэ аккаастаммытын истэн аһынан сүрэхтэрэ ытырбахтаан ылбыта. Тута биһиги оҕобут дии санаабыттара.

Иккис кууруска Саҥа дьылга дойдутугар барбакка, хоско бииргэ олорор кыргыттарын кытта көрсөргө быһаарыммыта. Ийэтэ даҕаны кыыһа улаатан эдэр сааһыгар тэҥнээхтэрин кытта сылдьара ирдэнэр диэн бопсубатаҕа. Олоҕун аргыһын, маҥнайгы тапталын кытта ахсынньы 31 күнүгэр билсибитэ. Салаат оҥороору куукунаҕа буһара уурбут этин көрөөрү тахса сылдьан көрүдүөргэ уун-утары Романы кытта кэтиллэ түспүттэрэ. Харахтара утары көрсүбүттэрэ, кыыс долгуйан эппэт кэлэҕэй буолбута, мэктиэтигэр көхсүнэн итии салгын ааһарга дылы гыммыта. Рома аттынааҕы хоско уолаттарга ыалдьыттыы киирбит этэ. Киэһэ эдэр дьон хосторунан хардарыта эҕэрдэлэһэ сылдьан билсибиттэрэ. Онтон ыла биир да күн арахсыбакка, эһиилигэр ыал буоларга быһаарыммыттара. Ира ийэтэ кыыһым хат буолан ситэ үөрэниэ суоҕа дии санаабыта гынан баран, оҕотун санаатын утарар кыаҕа суоҕун билэрэ, онон ити туһунан тыл да быһаҕаһын быктарбатаҕа.

Утуйбатах түүннэр

Үөрэнэр сылларыгар уонна эдэрдэрэ да бэрт буолан, маҥнай утаа оҕо үөскээбэтин улахаҥҥа уурбатахтара, буолуохтааҕын курдук ылыммыттара. Үөрэхтэрин кэнниттэн үлэ үөһүгэр түспүттэрэ. Ира таайа өрөспүүбүлүкэ биир биллэр тэрилтэтигэр дириэктэри солбуйааччынан олороро, онон туох да кыһалҕата суох үлэ булбута. Инженер идэлээх Романы эмиэ быраактыкатын ааспыт тэрилтэтэ үөрүүнэн үлэҕэ ылбыта. Эһиилигэр төрөппүттэрэ көмөлөһөн, эбии кирэдьиит ылан куорат киинигэр икки хостоох кыбартыыра атыыласпыттара. Онон куорат ыала аатын сүгэ түспүттэрэ. Ол эрээри, туох эрэ итэҕэһин саҥа кыбартыыраҕа киирээт да билбиттэрэ. Эбиитин оҕолонуохпут диэн өрөмүөн оҥортороллоругар тута туспа быыстаабыттара иччитэ суох турара соччото суоҕа. Ийэлэрин сүбэтинэн уоппускаларын кэмигэр быраастарынан көрдөрүммүттэрэ гынан баран, туох да улахан ыарыыны булбатахтара. Килиимэт уларыта диэн уоппускаларыгар араас дойдуларынан сылдьаллара. Ити курдук биирдэ өйдөөбүттэрэ номнуо ыал буолбуттара уон сыл ааспыт эбит. Ира оҕо үөскээбэт диэн бэйэтин буруйданара. Бииргэ сырыттахтарына кэргэнэ өрүү оҕолору таптыы көрөрүн бэлиэтиир буолбута. Сыыйа үлэтигэр тардыллара, доҕотторун кытта көрсөрө үксээбитэ. Сороҕор хойутаатым, массыына суох, бултуу барабын диэн хоно хаалара элбээбитэ. Ира Роматын төһө да таптаатар, арахсыах диэн этиэн баҕарталыыра да, туох эрэ тутар, саҥардыбат, күөмэйигэр бүөлүү турар курдуга. Ити сылларга Ира төһөлөөх элбэх харах уутун тохпутун сыллата уларытар сыттыктара эрэ билэн эрдэхтэрэ. Эбиитин биир дойдулаахтара, билэр дьоно көрсө түстэхтэринэ, бэйэтэ даҕаны сап саҕаттан салҕана сылдьар киһиттэн оҕо туһунан ыйытан ууга-уокка түһэрэллэрэ.

Ийэтэ оҕото ииттэ ылыҥ диэн сүбэлээн көрбүтүн, Ира бэйэм оҕолонуом, Рома ылыныа суоҕа диэн истэ да барбатаҕа. Ол да буоллар сыл-хонук ааһан, сааһа ыраатан эрэрин өйдөөн, биир үтүө күн туох баар күүһүн мунньунан, кэргэнин кытта аһаҕастык кэпсэтэргэ санаммыта.

Оҕо кута

Өрүү буоларыныы, бээтинсэ күн киэһэ минньигэс остуол тардыбыта. Таһырдьа курулаччы кутар ардах быһаарыылаах кэпсэтии буоларын билбиттии, түннүккэ охсуллар тыаһа тоҥсуйар курдук иһиллэрэ. Ира куукуна уотун умуруоран баран остуол икки кытыытыгар турар лаампалары холбоотун кытта дьиэ иһэ сырдыы, сандаара, тута арамаантыка эйгэтин үөскэтэ түспүтэ. Рома үлэтиттэн кэлээтин кытта аһаан бүтүүлэрин саҕана, эдэр хаһаайка бэрт холку куолаһынан кэпсэтиини саҕалаабыта. Бэйэтэ даҕаны соһуйуон иһин, Рома арахсар туһунан букатын толкуйдаабатын, ол оннугар оҕо ииттэр туһунан кэлин элбэхтик саныырын, кыайан эппэккэ сылдьарын иһитиннэрбитэ. Ити курдук икки сүрэх санаалара биириттэн сүргэлэрэ көтөҕүллүбүтэ, мэктиэтигэр кэлиҥҥи сылларга мунньуллубут сүгэһэрдэрэ түспүккэ, чэпчээбиккэ дылы буолбута. Сарсыҥҥы күнүттэн тута кэпсэтии ыытан, дьонтон сүбэлэтэн, докумуоннарын хомуйан барбыттара. Бэрт кылгас кэм иһигэр барыта табыллан, сатанан испитэ.

Биир үтүө күн оҕо дьиэтигэр тиийэн, кырачаан уолу таптыы көрбүттэрэ. Ийэтэ аккаастаммытын истэн аһынан сүрэхтэрэ ытырбахтаан ылбыта. Тута биһиги оҕобут дии санаабыттара. Ким эрэ уонунан сыл оҕолонуон баҕарар да кыаллыбат, ким эрэ Айыылар бэйэлэринэн ыыппыт оҕолоруттан аккаастаналлар диэн уолчаан ийэтин сүөргүлүү санаабыттара.

Кырачаан киһи дьиэ боруогун атыллаатын кытта кыбартыыралара сырдыы түспүтэ. Тута уонча сылы быһа кинини күүтэн турбут хоһугар киллэрбиттэрэ эрээри, икки хонугунан соҕотоҕун утуйуо суоҕун, түүн уһуктарын билэн оронун бэйэлэрин хосторугар көһөрбүттэрэ.

Уолларын күн курдук сандаарыйа сырыттын, олоҕо ырааһы, сырдыгы эрэ кытта ситимнээх буоллун диэн сүбэлэһэн баран аатын уларытан, Сандал диэн сүрэхтээбиттэрэ. Төрөппүт оҕолорун кэриэтэ таптаабыттара.

Сандал лоп-курдук икки сааһын туолуута, Ира ыйдааҕыта кэлбэтэҕэр, сааһым ыраатта, аны кэлэн хат буолар үһүбүөн диэн бэйэтин албыннанымаары, ити санааны киэр илгибитэ. Ол эрээри, оҕо кута иҥнэҕинэ, оҕо иитэ ылбыт дьон оҕолоноллорун туһунан аахпыт, истибит буолан аптекаттан тест ыларга санаммыта, онто икки баҕалаах кыһыл сурааһыны көрдөрбүтэ. Бэйэтэ чахчытын билэн эрэ баран этээри, икки нэдиэлэ курдук Ромаҕа биллэрбэккэ сылдьыбыта. Баҕалаах УЗИтын оҥорторон, быраас чахчы хат буолбуккун диэн бигэргэппитин эрэ кэннэ этэн, сүрэҕин аҥаарын соһуппута, дьоллообута. Ыал буолбуттара уон үс сыл ааспытын кэннэ күүтүүлээх-кэтэһиилээх кырачаан кыыс күн сирин көрбүтэ.

Биир үтүө күн Ира оҕолорун таһырдьа былаһааккаҕа оонньото сылдьан тэйиччи соҕус, умса туттан олорор эдэрчи дьахтары бэлиэтии көрбүтэ. Адьас кимиэхэ эрэ майгынныыра да, бу диэн кыайан быһаарбатаҕа. Ити түгэн кэнниттэн дьахтары сотору-сотору көрөр буолбута. Уора-көстө уолу одуулуурун билэн баран, Сандал ийэтэ, үүт-үкчү киниэхэ майгынныыр эбит диэн тута сэрэйбитэ.

Үлэ чааһа бүтүөн иннинэ аан звонога тыаһаабытыгар саҥата суох тиийэн арыйбыта, арай, кини турара. Ира кырыы хараҕынан көрбөтөҕө, холдьоҕон ыыппатаҕа, тоҕо эрэ аһаҕастык кэпсэтэргэ быһаарыммыта, аан хоско аһарбыта. Оттон Маруся бу номоҕон дьүһүннээх, сырдык дьахтары чугастан көрөөт даҕаны тута холкутуйа түспүтэ. Ол да буоллар, соруктаах кэлбит киһи быһыытынан Сашатын (Сандал төрөөтүн кытта ити курдук ааты иҥэрбитэ) бэйэтигэр ылыан баҕарарын быктарбыта. Ира бу курдук тыллары син-биир хаһан эмэ истиэм диэн сэрэйэрэ, онон бэрт ыраахтан эргитэн аҕалан Сандал кинилэр мааны, бастакы оҕолоро, олохторун сырдатар, бүтүн ыал эрэлин түстүүр киһи буоларын, кини эрэ баар буолан арахсыбатахтарын, кыыстаммыттарын быһааран биэрбитэ. Итиэннэ Сандалы тапталынан улаатыннарыахпыт, өйдүүр, ылынар сааһа кэллэҕинэ хайаан даҕаны төрөппүт ийэтэ тыыннааҕын туһунан хайдах баарынан кэпсиэхпит диэн эрэннэрбитэ. Маруся даҕаны кинилэри кэтээбитэ ырааппыт, уолун бу атын дьахтар төрөппүт ийэ кэриэтэ таптыырын көрбүт буолан саҥарбатаҕа. Таптыыр киһитэ быраҕан барбытыттан хомойон, төрөппүттэриттэн куттанан, оҕотун таһаарар дьиэтэ да суох буолан, быстах санааҕа ылларан аккаастаммытын билиммитэ. Билигин уһуйааҥҥа сылдьар кыыс оҕолооҕун, кэргэннээҕин кэпсээбитэ.

Ира билигин дьон оҕо кута диэн суох диэтэхтэринэ, сымыйалаамаҥ, бэйэбинэн билэбин диир толору кыахтаах. Санааны түһэрбэккэ эрэниэххэ, тапталы харыстыахха эрэ наада диэн бигэ өйдөбүллээх. Үрдүк Айыылар улахан тургутуу кэнниттэн ыыппыт көмүс чыычаахтарын харахтарын харатын курдук көрөллөр, харыстыыллар. Талбыт курдук уоллаах кыыс оҕолоро бэйэ-бэйэлэрин ситэрсэн биэрэн, күннээҕи олохторун сырдаталлар.

ХААРТЫСКА: /PXHERE.COM/RU СААЙТАН.