Хаартыска: Мария Васильева, ЯСИА.
Бүгүн, алтынньы 7 күнүгэр, Саха сирин бары мэдиссиинэ тэрилтэлэригэр Оҕо күүтэр дьахталлар күннэригэр анаммыт тэрээһиннэр буолуохтара.
Тэрээһиннэр бырагыраамалара өрөспүүбүлүкэ бары улуустарын уонна куораттааҕы уокуруктарын хабаллар, онно кэнсиэрдэр, тыйаатыр туруоруулара, маастар-кылаастар, сэминээрдэр, лиэксийэлэр, төгүрүк остуоллар, хаартыскаҕа түһэриилэр уонна тематическай аахсыйалар киирэллэр. Мэдиссиинэ тэрилтэлэргэ «Аһаҕас аан күннэрэ», акушер-гинекологтары кытта быһа сибээстэр, ону таһынан оҕо төрөөбүтүн регистрациялааһын уонна эдэр ыаллары өйөөһүн боппуруостарыгар анаммыт ЗАГС уорганнарын исписэлиистэрин кытта көрсүһүүлэр ыытыллыахтара.
Социальнай эйгэ тэрилтэлэригэр Оҕо күүтэр дьахталлары чиэстиэхтэрэ, бэлэхтэри туттарыахтара, күрэхтэри, кулууп көрсүһүүлэрин уонна айар маастар-кылаастары ыытыахтара.
«Оҕо күүтэр дьахталлар күннэрин ыытыы сүрүн сыала-соруга — дьиэ кэргэн үнүстүүтүн бөҕөргөтүү, эппиэтинэстээх төрөппүт буолууну киэҥник тарҕатыы уонна оҕо күүтэр дьахталларга харыстабыллаах сыһыан култууратын олохтооһун буолар. Бырааһынньыктааҕы бырагыраамалар уопсастыбаҕа оҕо күүтэр дьахтар статуһун үрдэтиигэ уонна ийэ, оҕо олоҕун, доруобуйатын сыаннаһын бигэргэтиигэ туһуланаллар. Бу национальнай бырайыак стратегическай соруктарыгар уонна өрөспүүбүлүкэ баһылыгын ыйааҕар бэлиэтэммит бастыҥ хайысхаларга сөп түбэһэр», — диэн СӨ Доруобуйа харыстабылын министиэристибэтин сүрүн акушер-гинеколога Лилия Анкушева кэпсээтэ.
СӨ Доруобуйа харыстабылын министиэристибэтин дааннайынан, быйыл тоҕус ый иһигэр эрэгийиэн мэдиссиинэ тэрилтэлэригэр 7859 оҕо төрөөтө, олортон 79-һа игирэлэр. Саҥа төрөөбүт оҕолортон 4001-рэ — уол, 3858-һа – кыыс. Оҕо күүтэр дьахталлар күннэрэ Арассыыйаҕа сылга иккитэ — муус устар 7 уонна алтынньы 7 күннэригэр бэлиэтэнэр. Бырааһынньык сүрүн соруктарыгар уопсастыбаҕа хас биирдии кэлэр кэскиллээх ийэҕэ ытыктабыллаах сыһыаны олохтооһун, дьахталларга хат буолуу бары кэрдиис кэмигэр тоҕоостоох усулуобуйаны тэрийии, ону таһынан ийэ буолууну кытта сибээстээх үтүө, кэскиллээх уопсастыбаннай хайысханы сайыннарыы киирсэр.
Дьокуускай куорат суута Үөһээ Бүлүү оройуонун «Тыа хаһаайыстыбатын управлениета» тэрилтэ урукку салайааччытыгар уонна кэммиэрчэскэй тэрилтэлэр…
Саха сирин «Сюрприз» үҥкүү норуодунай ансаамбыла Соҕуруу Кэриэйэҕэ норуоттар икки ардыларынааҕы мааска бэстибээлгэ ситиһиилээхтик кытынна.…
Саха сирин соҕуруу өттүгэр суукка устата иккис 4,5 магнитудалаах сир хамсааһына бэлиэтэннэ. Алтынньы 7 күнүгэр сарсыарда өрөспүүбүлүкэ Амур…
Алтынньы 7 күнүгэр Ый Сиргэ саамай муҥутаан чугаһыаҕа, ол түмүгэр уруккутунааҕар өссө бүк улаатан уонна…
Дьокуускайга РФ Бырабыыталыстыбатын Бэрэссэдээтэлин солбуйааччы – РФ Бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ, «ВОИН»…
Алтынньы 2-5 күннэригэр Азербайджан Ханкенди куоратыгар СНГ дойдуларын III Оонньууларын чэрчитинэн оҕунан ытыыга күрэхтэһии буолан…