Оҕо лааҕырын сыаната 54 тыһ. солк. тиийдэ

Быйыл оҕо сайыҥҥы лааҕырдарыгар суруйтарыы ыам ыйын 15 күнүттэн Судаарыстыбаннай өҥө порталынан саҕаламмыта. Босхо путевкаттан маппыт, төлөбүрдээх эрэ лааҕырдарга хапсар үөрэнээччилэр төрөппүттэрэ оҕолорун ханна сынньатар туһунан толкуйга сылдьаллар.

Өрөспүүбүлүкэ лааҕырдара

Путевка аҕыйаҕынан босхо миэстэлэр бэрт түргэнник бүтэн, аккаас кэлэн маппыт оҕо элбэх. Билигин төрөппүттэр төлөбүрдээх миэстэлэр сыаналарын, хайысхаларын үөрэтэллэр.

“Сосновай бор” киин оҕону сынньатыыны, чэбдигирдиини тэрийэр салаатын старшай мэтэдииһэ Ульяна Чупрова:

— Урут, Судаарыстыбаннай өҥө портала киирэ илигинэ, улуус аайы аҕыйахтыы да буоллар, кубуота тыырыллар этэ. Кэлиҥҥи сылларга араас төрүөтүнэн, ирдэбил да күүһүрэн, элбэх санаторий балаһыанньата уустугурбутун бары билэбит. Ол курдук, сайыҥҥы кэмҥэ элбэх санаторийдар-

га (холобур, «Чэбдик», «Абырал», «Якуткурорт», «Смена» (ХИФУ), «Кытыл» Амма улууһа, «Дружба» (Үлэ, социальнай сайдыы министиэристибэтэ), «Горизонт» (Якутуголь, Нерюнгри) 4 тыһ. тахса, аҥаардас “Сосновай бор” кииҥҥэ сыл устата 4 тыһ. тахса оҕо сынньанар буоллаҕына, 2021 сылтан миэстэтэ лаппа аччаабыта. Онон бу сайын үс былаһаакканан 1 тыһ. курдук путевка көрүлүннэ. Итинтэн 556 путевка өрөспүүбүлүкэ бүддьүөтүттэн, 400 путевка “Энэргиэтик” лааҕырга “Воин” федеральнай бырайыагынан оҕолору түмүөҕэ.

Оҕо сынньалаҥын тэрийии ирдэбилэ сылын аайы олус күүһүрэн иһэр, санитарнай усулуобуйатыттан саҕалаан, терроризмы утары үлэ өттүнэн анал идэлээх үлэһиттэринэн хааччыйыы, уо. д. а. Путевка рыночнай сыаната лаппа үрдээтэ, онон тэрийэр дьоҥҥо аҥаардас үбү-харчыны булуута, оҥоруута уустугурда.

Бу балаһыанньаны саҥа тутулла турар 350 миэстэлээх “Полярнай звезда” оҕо сынньалаҥын уонна чэбдигирдиитин киинэ арыллар түгэнигэр быһаарыа диэн эрэнэбит.

Онон билигин сүрүн болҕомто куорат таһынааҕы баазалары, ол эбэтэр, хонуктаах лааҕырдары сөргүтүүгэ, элбэтиигэ ууруллар. Ааспыт сылга федеральнай куонкуруска 5 лааҕыр кыттан кыайыылаах буолбута. 2024–2027 сс. 700 миэстэлээх эбии 14 куорпус үлэҕэ киириэхтээх. Быйыл сайын Дьокуускай куоракка “Спутник” лааҕыр 50‑нуу миэстэлээх 4 саҥа куорпуһа уонна Мэҥэ Хаҥалас улууһун Нуораҕана бөһүөлэгэр “Илгэ” лааҕырга эмиэ 50 миэстэлээх 2 куорпус тутуллан оҕолорго аанын аһыахтаах.

Оҕо сынньалаҥын уонна чэбдигирдиитин өҥөтүн, бастатан туран, анал байыаннай дьайыыга сылдьар төрөппүттэрдээх оҕолор туһаналларыгар болҕомто ууруллар диэн этэр.

Ханна сынньатабыт?

Куорат, улуус оҕолорун сайыҥҥы өттүгэр сынньатар лааҕыр төһө элбэҕин, билигин ханна миэстэ баарын туһунан ыйыталаспыппытыгар:

— Быйыл сайын Дьокуускай куоракка 63 муниципальнай лааҕыр арыллар буоллаҕына, итинтэн 4 лааҕыр куорат таһынааҕы (“Спутник”, “Радуга”, “Каландаришвили”, “Арктик уонна космос” (“Родничок”), 3 — балаакканан, 2 — үлэ уонна сынньалаҥ лааҕырдара уонна 54 оскуолаҕа арыллар күнүскү былаһааккалар. Бу туһунан толору информацияны реестргэ көрөн билсэллэр. Манна сыаната, хаһан арыллара, хонугун уһуна, бырагыраамата, ханнык төлөпүөнүнэн билсэллэрэ барыта суруллар.

Төлөбүрдээх лааҕырдар сыаналара күнүттэн, ханнык көрүҥнээҕиттэн тутулуктаах. Лааҕырдар туһунан иһитиннэриини үөрэх управлениетын саайтыгар “Летняя оздоровительная кампания 2025” диэн туспа сирэйтэн көрүөхтэрин сөп уонна хас биирдии оскуола саайтыгар эмиэ суруллар.

Судаарыстыбаннай лааҕырдар «Сосновай бор» ыам ыйын 30 күнүттэн, “Энэргиэтик”, “Кэскил” бэс ыйын 15 күнүттэн арыллаллара былааннанар. Бу туһунан иһитиннэрии “Сосновай бор” саайтыгар баар.

Маны таһынан, сайын устата кылгас кэмнээх куруһуоктары, устуудьуйалары, оҕолорго аналлаах араас тэрээһиннэри урбаанньыттар, тэрилтэлэр, уопсастыбаннай түмсүүлэр тэрийэллэр. Бу лааҕыр ирдэбилиттэн ураты, бэрэбиэркэҕэ киирбэт “малозатратные формы отдыха, досуга и занятости” диэн буолар, — Ульяна Никифоровна быһаарар.

Путевка сыаната төһөнүй?

Босхо путевкаҕа хапсыбат дьон оҕолорун сынньалаҥын тэрийэр араас көрүҥнэри тобулаллар: сорох оҕолору дэриэбинэҕэ ыыталлар, атыттар төлөбүрдээх лааҕырдарга, күнүскү сынньатар, аралдьытар тэрээһиннэргэ суруйтараллар. Сыаната төһө эбитий?

“Бүгүҥҥү туругунан босхо путевкалаах лааҕырдар туолан тураллар. Оҕо туох эмэ төрүөтүнэн аккаастанар түгэнигэр анаан резервнэй испииһэк эмиэ оҥоһуллар. Сыаналара лааҕыр көрүҥүттэн, хонугун уһунуттан тутулуктанан 8–52 тыһ. солк. диэри халбаҥныыр. Ону аныгы үйэ сиэринэн тэрилтэ саайтыгар көрүөххэ эбэтэр “суһал лииньийэ” нүөмэринэн +78005001421 ыйыталаһыахха сөп. Холобур, «Сосновай бор» лааҕырга 21 күннээх путевка 54 410 солк. тэҥнэһэр. Манна оҕо 21 күн аһылыгын, хонугун, чэбдигирдэр процедура ыларын таһынан эбии үөрэх бырагыраамата, араас экскурсиялар, өйдөбүнньүк бэлэхтэр, бириистэр киирэллэр”, — диэн Ульяна Никифоровна этэр.

Дьокуускай куораттааҕы үөрэх управлениетын саайтыгар оҕо сынньалаҥын тэрийии туһунан иһитиннэриигэ лааҕырдары тэрийии дьаһалыгар, ханнык көрүҥнээх, хас лааҕыр аһылларыгар тиийэ барыта ыйыллар. Дьэ, төрөппүт манан сирдэтэн, тустаах үөрэх тэрилтэтин саайтыгар киирэн, кини оҕото баҕарар лааҕырыгар хас сезон аһылларын, төлөбүрэ төһөтүн, хайдах суруйтарыан сөбүн, туох докумуон ирдэнэрин булан ылар. Холобур, Дьокуускай куораттааҕы 2‑с нүөмэрдээх оскуола “Спутник” лааҕыра — өрөспүүбүлүкэ улахан лааҕырдарыттан биирдэстэрэ. Оскуола саайтыгар иһитиннэрии барыта баар. Быйыл түөрт сезон үлэлиир. 21 күннээх бастакы, үһүс сезоннарга төлөбүрэ 45660 солк., 10 күннээх иккис сезоҥҥа — 24128 солк., 8 күннээх төрдүс сезоҥҥа — 24481 солк.

Онтон оскуола, биирдиилээн тэрилтэ иһинэн аһыллар күнүскү лааҕыр олус элбэх. Сыаналара, ортотунан, 8–25 тыһ. солк. диэри халбаҥныыр. Куоракка аһыллар күнүскү лааҕырдар туһунан элбэх иһитиннэрии “Мост” сыһыарыыга, “Досуг и занятость детей в г. Якутске” ТГ ханаалга, о. д. а. ситимнэргэ элбэх.

“Балар төлөбүрдээхтэр уонна оҕо интэриэһинэн үгүс дьарыгы ыыталлара кэрэхсэнэр. Бастатан туран, манна оҕону ыытарга төрөппүт тэрийээччилэри кытта усулуобуйатын үчүгэйдик билсэн баран дуогабар түһэрсэрэ тоҕоостоох. Араас түгэннэр тахсаллар, үҥсүүлэр киирэллэр. Бу, лааҕырдар испииһэктэригэр киирбэтэх буоллаҕына, төрөппүт бэйэтэ эппиэтинэһи сүгэрин санатабыт”, — диэн Ульяна Никифоровна чопчулуур.

Быйылгыттан лааҕыры тэрийээччилэр бары саайт арыналлара ирдэнэр. Маны таһынан, лааҕырдар уопсай реестрдэрэ Үөрэх уонна билим министиэристибэтин саайтыгар Саха-отдых-детей.РФ диэн специализированнай порталга тахсар.

СЫЫППАРАЛАР

Өрөспүүбүлүкэҕэ быйыл сайын
550 лааҕыр үлэлиирэ былааннанар:
— Сылы эргиччи үлэлиир —
2 киин (“Сосновай бор”, “Сир
уустара”),
— куорат таһынааҕы
хонуктаах —
42
— үлэ уонна сынньалаҥ
43
— палаточнай
31
— күнүскү
432
Манна барыта
56
тыһыынчаттан тахса оҕо
хабыллыахтаах (үөрэнээччи уопсай ахсааныттан 37%).

Хаартыска: СИА