Оҕо олоҕор куттал суоһаабат

Бу сарсыарда социальнай ситимнэринэн Дьокуускайга 1 №-дээх РБ Перинатальнай кииҥҥэ дьахтар приемнай отделениеҕа туран эрэн төрөөбүтүн туһунан сурах тарҕанна.

СӨ Доруобуйа харыстабылын министиэристибэтэ бу буолбут түбэлтэ туһунан телеграм-ханаалыгар иһитиннэрэр:

“Перинатальнай киин приемнай отделениетыгар 10 чаас 33 мүнүүтэҕэ төрөөрү ыгыста сылдьар дьахтар кэлбит. Итиэннэ биир мүнүүтэ иһигэр, сарсыарда 10 ч. 34 мүн. приемнай отделение фойетыгар түргэн (стремительный) төрөтүү буолбут. Оҕону тута саҥа төрөөбүт оҕолор интенсивнай терапияларын уонна реанимацияларын отделениетыгар илдьибиттэр, онно наадалаах анал мэдиссиинэ көмөтүн оҥорбуттар. Оҕону бэрэбиэркэлээһин түмүгэр төбөтүн уҥуоҕун  уҥа өттүгэр линейнай тостуулааҕа көстүбүт. Билигин оҕоҕо туох да куттал суоһаабат. Кини туругун күнүстэри-түүннэри кэтээн көрөллөр.

СӨ Доруобуйа харыстабылын министиэристибэтэ ийэ да, саҥа төрөөбүт оҕо да доруобуйатын хонтуруолга тутан олорор. Буолбут быһылааны быһаарарга  тута служебнай бэрэбиэркэ ыытыллыаҕа. Ол түмүгүнэн наадалаах миэрэлэр ылыллыахтара”.