Оҕо оонньуурдарын оннугар — арыгы бытыылкалара…

Ис дьыала  министиэристибэтин сааһын ситэ  илик оҕолор дьыалаларыгар салаата атырдьах ыйын  19 -23  күннэригэр «Спаси ребенка» диэн  суһал-профилактическай тэрээһини ыытта. Бу туһунан министиэристибэ пресс-сулууспата иһитиннэрдэ.

Балаҕан ыйын бастакы декадатыгар диэри маны таһынан өрөспүүбүлүкэҕэ  «Помоги пойти учиться» Бүтүн Арассыыйатааҕы аахсыйа ыытыллыахтаах.

Полиция үлэһиттэрэ  бу күннэргэ рейдэлэри ыыттылар. Ол курдук, атырдьах ыйын 21 күнүгэр, Ис дьыала үлэһиттэрэ Саха Өрөспүүбүлүкэтин оҕо быраабыгар боломуочунай  аппараатын,  социальнай-реабилитационнай киин,  дьиэ кэргэҥҥэ  психологическай көмө киинин уонна доруобуйа харыстабылын уорганнарын бэрэстэбиитэллэрин кытта  оҕолорго көмөлөһөр сыаллаах  олохторугар табыллыбатах, кыаммат 10 ыалга сырыттылар

Бэрэбиэркэ түмүгэр биллибитэ,  элбэх оҕолоох биир ыал аһыы утаҕынан үлүһүйэллэрэ билиннэ. Бу ыал түөрт оҕолоохтор (5 ыйыттан саҕалаан   5  сааһыгар тиийэ).  Туһааннаах ыал  бэрэбиэркэттэн куотан, хаста  даҕаны олорор аадырыстарын уларыта сылдьыбыт.  Саҥа аадырыһынан бэрэбиэркэ тиийбитигэр төрөппүттэр итирик туруктаахтар эбит. Оҕолор барахсаттар аһылыгынан, сөптөөх таҥаһынан-сабынан,  утуйар таҥаһынан хааччыллыбатахтар. Кыбартыыра кирдээх, санитарнай ирдэбил тутуһуллубат. Оҕо оонньуурун оннугар арыгы бытыылкалара эрэ бааллар.

Төрөппүттэр административнай эппиэтинэскэ тардылыннылар.  Олорор аадырыстарынан эпиэкэ уорганын үлэһиттэрэ ыҥырылыннылар. Кыра оҕолор билигин    «Республиканский центр содействия семейному воспитанию» ГБУ киллэрилиннилэр.