Оҕо пааркаҕа оонньуу сылдьан, саанан ытыллыбыт

Амма оройуоннааҕы борокуратуурата сааһын ситэ илик оҕо эчэйбитинэн бэрэбиэркэни ыытта. Бу туһунан СӨ Борокуратуурата иһитиннэрэр.

Бэрэбиэркэ быһаарбытынан, Амма улууһун биир сэлиэнньэтигэр сынньалаҥ пааркатыгар сааһын ситэ илик оҕо оонньуу сылдьан атын оҕону пневматическай саанан алҕаска ыппыт. Ол түмүгэр оҕо хараҕын диэки эчэйбит.

Полиция уорганнара оҕо холуобунай эппиэтинэһи сүгэр сааһын туола илигинэн сибээстээн, холуобунай дьыаланы тэрийэртэн аккаастаммыттар. Сокуоннай бэрэстэбиитэллэр административнай эппиэтинэскэ тардыллыбыттар.

Сааһын ситэ илик оҕо туһатыгар борокуратуура ыппыт оҕо сокуоннай бэрэстэбиитэллэриттэн моральнай толуйууну ирдээбит.

Суут борокуруор ирдэбилин өйөөн, оҕо туһугар 30 тыһ.солк. толуйууну ылбыттар.