Оҕо саас сылыгар бастакы төрөөбүт оҕону Одунхан диэн ааттаатылар

Тохсунньу 16 күнүгэр өрөспүүбүлүкэ киин куоратыгар Арассыыйаҕа Дьиэ кэргэн сылыгар уонна Саха сиригэр Оҕо саас сылыгар аан бастакы төрөөбүт оҕоҕо ааты иҥэрии сиэрэ-туома буолан ааста.

Төрөппүттэрэ уолларын Одунхан диэн ааттаабыттар, ол аата «айааччы», «салайааччы», тулалыыр эйгэни уларытар диэн суолталаах.

Бу уол оҕо 2024 сыл тохсунньу 1 күнүгэр Михаил Андреевич уонна Ирина Иннокентьевна Михайловтар дьиэ кэргэннэригэр төрөөбүтэ. Кини тохсунньу 1 күнүгэр 01:16 ч. дойду Бэрэсидьиэнэ Владимир Путин биллэрбит Дьиэ кэргэн сылыгар уонна Саха сирин Аҕа баһылыга Айсен Николаев биллэрбит Оҕо саас сылыгар Дьокуускай куоракка күн сирин көрбүтэ.

«Биһиги 2022 сыл от ыйыгар дьылҕабытын холбообуппут. Одунхан – биһиги күүтүүлээх бастакы оҕобут. Биһиги оҕобутун эһээтин аатынан Одун диэн ааттаабыппыт – бу сахалыы аат, мин кэргэним Ирина аҕатын аата. Кинини төрөөтүн кытары балыыһаҕа сүрдээх күүстээх, улахан куоластаах уонна кытаанах майгылаах диэбиттэр. Быйыл биһиги элбэх былааннаахпыт – уол оҕону төрөттүбүт, аны дьиэбитин ситэри туттуохпут. Магистратураны бүтэрдэхпитинэ, бэйэбит дойдубутугар – төрөөбүт Эбээн Бытантайбыт улууһугар төннөр уонна тыа хаһаайстыбатын сайыннарарга үлэлиир былааннаахпыт», – диэн эдэр ыал аҕата Михаил Михайлов санаатын үллэһиннэ.

Оттон ыал ийэтэ Ирина, Саха сирин олохтоохторугар туох барыта дьиэ кэргэнтэн саҕаланарын уонна өрөспүүбүлүкэ олохтоохторугар этэҥҥэ буолууну, тапталы уонна өйдөһүүнү баҕарарын тоһоҕолоон бэлиэтээтэ.

«Бүгүн өрөспүүбүлүкэҕэ ураты, саҥа киһи баар буолла. Олус кыраһыабай, суолталаах ааты талбыккыт. Маннык ааттаах-суоллаах Одунхан Михайлович Михайлов биһиги өрөспүүбүлүкэбит устун аатын киэн тутта хаамыа уонна төрөппүттэригэр үөрүүнү-көтүүнү эрэ аҕалыа дии саныыбын. Саха сирин баһылыга Айсен Николаев кэлбит 2024 сылы Оҕо саас сылынан биллэрбитэ. Кини биһиги бүгүҥҥү сорукпут – оҕолорбут, кэлэр кэскилбит туһугар олоруу диэн тоһоҕолоон бэлиэтээбитэ. Бүгүн биһиги манна олугу оҥоруохтаахпыт», – диэн СӨ Бырабыыталыстыбатын Бэрэссэдээтэлин солбуйааччы Ольга Балабкина эттэ.

Саха Өрөспүүбүлүкэтин Бырабыыталыстыбатын иһинэн Дьокуускай куораттааҕы ЗАГСа салалтатын үлэһиттэрэ оҕо төрөөбүтүн туһунан сибидиэтэлистибэни туттаралларыгар бу докумуоҥҥа оҕо аата сурулунна, онон киэн туттуохтаах, араспаанньата – кини өбүгэлэрин бэлэҕэ, ону кини бэйэтин оҕолоругар биэриэхтээх, оттон Ийэ дойдута – кини төрөөбүт сирэ уонна олоҕу бэлэхтээбит төрөппүттэрин ааттара диэн бэлиэтээн эттилэр.

Тэрээһин кыттыылаахтара дьиэ кэргэҥҥэ оҕо төрөөһүнэ – улахан дьол буолар диэн уонна Одунхан барытыгар бастакы буоллун диэн баҕа санааларын эттилэр.