Оҕо саас сылыгар «Үйэ оҕолоро» хапытаалы 2700-тэн тахса ыал туһанна

СӨ Үлэҕэ уонна социальнай сайдыыга министиэристибэтин иһитиннэриитинэн, «Үйэ оҕолоро» тус сыаллаах хапытаалы Саха сиригэр Оҕо саас сылын бастакы икки ыйыгар 2752 дьиэ кэргэттэр туһаннылар.

Санатан эттэххэ, бу тус сыаллаах хапытаал Ил Дархан Айсен Николаев быһаарыытынан биэс сылга, 2027 сылга диэри, уһатыллыбыта.

Байыаннай сулууспалаахтар дььиэ кэргэттэригэр биир кэмнээх матырыйаалынай көмө быйыл тохсунньуга — 709, бастакы оҕону төрөөбүт эбэтэр иитэ ылбыт ийэлэргэ биир кэмнээх төлөбүр – 547 ыалга бэрилиннэ.

Иккис оҕоҕо Саха сирин ийэ хапытаала бу икки ый иһигэр – 408, олорор дьиэлэри гаастааһыҥҥа матырыйаалынай көмө – 169, кииннэммит сылааһынан хааччыйыыга матырыйаалынай көмө – 67 ыалга ананна.

Ону сэргэ икки бастакы ый иһигэр 148 эдэр ыал аан бастаан 25 саастарыгар диэри холбоһон, 50 тыһ.солк. суумалаах биир кэмнээх харчынан төлөбүрү ыллылар.

Уһук Илиҥҥэ Саха сирэ саамай элбэх оҕолоох ыалынан биллэр. Оҕо төрөөһүнүнэн Уһук Илиҥҥэ 1 миэстэни уонна дойду үрдүнэн 8- с миэстэни ылар. Саха сирэ демографияҕа лидеринэн буоларыгар, оҕону өйүүр федеральнай, эрэгийиэннээҕи дьаһаллар көмөлөһөллөр.

Кэнники биэс сылга Саха сиригэр ийэ уонна оҕо төрөөһүнүн өйөөһүҥҥэ үбүлээһин кээмэйэ 8 төгүл улаатта.

 СӨ Ил Дарханын уонна Бырабыыталыстыбатын пресс-сулууспата