Оҕо сааспыт доҕоро, Ньургустаан, быдан дьылларга быраһаай

Куруук үөрэ-көтө, мичээрдии сылдьыбыт оҕо сааспыт доҕоро, үөрэппит оҕом Ньургустаан Корнилов бүгүн, ыам ыйын 3 күнүгэр биһиги кэккэбититтэн суох буолбута 40 хонугун туолла.

Ньургустаан Николаевич Корнилов 1980 сыл балаҕан ыйын 26 күнүгэр Өлүөхүмэ улууһун Кыыллаах сэлиэнньэтигэр, элбэх оҕолоох Надежда Семеновна, Николай Михайлович Корниловтарга иккис оҕонон күн сирин көрбүтэ.

Ньургустаан диэн ааты иһиттим да харахпар даллаҕар кулгаахтаах, төп-төгүрүгүнэн көрбүт, өрүү үөрэн мичилийэ, дьээбэлээҕинэн чаҕылыйа сылдьар харахтаах уһуйаан саҕаттан билсэр, бастакы кылаастан бииргэ үөрэммит доҕорум Ньургустаан көстө түһэр.

Ньургустаан киһи быһыытынан олус көрсүө, наһаа дьээбэлээх, куруук үөрэ сылдьар уол этэ. Кимтэн даҕаны ордо сатаабат, хайдах баарынан, көнөтүнэн буолааччы. Туох баардааҕыттан барытыттан барыбытыгар дэлэччи бэрсэр, куруук барыбытын хаадьылыыр, күллэрэр, кыргыттары аһары дьээбэлээн кыратык кыыһыран да ылар кэмнэрдээх этибит. Ол эрээри, кини аһаҕастык, наһаа минньигэстик үөрэн кэбистэҕинэ кыыһырбыппыт тута ааһан хаалар этэ.

Бииргэ үөрэнэр доҕор быһыытынан олус көрдөөх буолааччы, кылаас туох баар олоҕор көхтөөхтүк кыттара. Уолаттар бары сайынын сопхуоска от оттооһунугар бараллара, күһүн каникул кэннэ көрсөммүт сайын устата хайдах сайылаабыппыт туһунан кэпсээн бөҕө буолааччыбыт. Онтон күһүн бары күргүөмүнэн хортуоска хостооһунугар сылдьарбыт, онно куулун саамай түргэнник толорооччу Ньургустаан буолара. Туох даҕаны хара үлэттэн туора турбат этэ, барытыгар күлэ-үөрэ ылсан иһэрэ.

Кэнники бииргэ үөрэммит доҕотторун олус ахтар эбит этэ уонна сырдыкка, кэрэҕэ наһаа тардыһара. Биирдэ төлүпүөнүнэн эрийэ сылдьыбыта, олоҕун, оҕолорун, кыыһын, кэргэнин наһаа истиҥник кэпсээбитэ, сүбэ-ама ыйыппыта.

Дойдубутун ахтан-суохтаан тиийдэхпитинэ, кылааһынан түмсэрбитигэр, уулуссаҕа ааһан иһэн да көрсө түстэххэ саамай үөрбүт-көппүт кини буолара. Куруук үөрэн мичилийэ, чаҕылыйа сылдьар харахтаах доҕорбут аны билигин суох диэн саныырга олус ыарахан.

Мин Ньургустааннаах кылаастарын 5-9-с кылаастарга салайан илдьэ сылдьыбытым. Өссө ол иннинэ кыра кылааска үөрэнэ сырыттахтарына продленнай бөлөххө үлэлээбитим, онон олох кыратыттан билэбин. Уолаттарым алтыалар этэ, бары да сытыы-хотуу оҕолор. Араас ыытыллар тэрээһиннэргэ кыттан, похуоттаан оскуола сыллара элэс гынан ааспыттара. Ол эрээри, куруук аттыгар сылдьыбыт оҕолоргун ордук чугастык саныыгын. Төһө да улаатталлар, куруук хайдах олороллорун сураһа сылдьаҕын.

Ньургустаан уолаттарын наһаа үчүгэйдик иитэлээтэ. Улахан уола Вадим хоһоон ааҕар бөлөхпөр дьарыктаммыта. Георгий спортсмен бэрдэ, тустуук. Аны мурун бүөтэ саамай тапталлаах кыысчаанын пуорка көрсөн илдьэ кэлэригэр бииргэ түбэһэн айаннаан кэлбиттээхпин. Саҥа төрөөбүт күүтүүлээх кыысчаанын хайдахтаах курдук долгуйан көрсүбүтүн умнубаппын. Кэлин төһө да улааттар, наар батыһыннара сылдьар буолааччы. Былырыын сайын өрүскэ кыысчааныныын сылдьарын көрсөн кэпсэппиппит.

Баһаарынньыгынан үлэлиир буолан, ыалларынан сылдьан сэрэтии үлэтин ыытар этэ. Киирэн кэллэҕинэ, үөрэн-көтөн, кэпсэтэн арахсааччыбыт.

9-с кылаас кэннэ икки кылаас холбоһон биир кылаас буолбуттара. 10-11-с кылааска иккис ийэлэрин курдук саныыр учууталларыгар Клара Ивановна Корнилова эрэллээх илиитигэр туттарбытым. Ол да буоллар хайдах сылдьалларын, үөрэнэллэрин кэтээн көрөрүм. Маҥнай кэлэктиипкэ киирэллэригэр ыарахаттардаах буолар. Оҕолорум ону этэҥҥэ аһарбыттара. Ол эрээри, сааһыран баран, бастаан тулаайахсыйбыт санаа син биир киирэн ааспытын билинэн, олус уйадыйбытым.

Ньургустааммыт былырыын сайын байыаннай дьайыыга баран эрэрин истэн олус соһуйбуппут. Кылааспыт социальнай ситимҥэ бөлөҕөр барыма эҥин диэн этэн көрбүппүт да: “Ким эрэ дойдубутун көмүскүөхтээх буоллаҕа”, – диэн бүтэһиктээхтик быһаарыммытын суруйбута. Доҕорбут чахчы хорсун, эр санаалаах, патриот буолан иитиллэн тахсыбытын кылгас ити суруга уонна бойобуой табаарыстара ыыппыт хаартыскалара туоһулууллар. Ыараханнык бааһырбытын истэн, олус аймаммыппыт. Бүтэһиккэ диэри бэттэх кэлиэ, өрүттүө, өссө да эдэр диэн эрэл санаалаахпыт. Кыах баарынан көмөлөһө сатаабыппыт да, ыйаах, дьылҕа ыарахан эбит.

Ньургустааммыт барахсан күн сиригэр күлүм гынан ааспыт олоҕун оҕолоро салгыахтара диэн эрэнэбит. Чугастык алтыспыт оҕоҥ, бииргэ үөрэммит доҕоруҥ күн сириттэн кэмин иннинэ күрэнэрэ олус ыарахан. Ол да буоллар, Ийэ дойдутун көмүскээн, олоҕун толук уурбутун хаһан да умнуохпут суоҕа. Ньургустаан сырдык сэбэрэтин куруук өйдүү-саныы сылдьыахпыт.

Ийэтигэр, кэргэнигэр, оҕолоругар, бииргэ төрөөбүттэригэр, чугас дьонугар дириҥ кутурҕаммытын тириэрдэбит. Оҕо сааспыт доҕоро, Ньургустаан, эн тэбэнэттээх, куруук үөрэ сылдьар мөссүөнүҥ мэлдьи биһиги өйбүтүгэр-санаабытыгар  баар. Быдан дьылларга быраһаай…

1997 сыллаахха Кыыллаах оскуолатын бүтэрбит выпуск аатыттан кылаас салайааччыта Августина Саввична Корнилова, бииргэ үөрэммит доҕотторо Олимпиада Корнилова, Василина Баланова, Людмила Попова.