Оҕо салгыы 10-11-с кылаастарга үөрэнэрин туох да хааччахтаабат

Алтынньы 22-23 күннэригэр Ил Түмэн уон төрдүс пленарнай мунньаҕа буолуохтаах, дьокутааттар Ил Дархан Төрүт Сокуоҥҥа уларытыылары киллэрэргэ этиилэрин көрүөхтээхтэр.  

Уларытыылар тоҕо киирэллэрин Ил Түмэн спикерин солбуйааччы Афанасий Владимиров “Якутия 24” биэриигэ өссө төгүл дьоҥҥо быһааран эттэ:

-Биһиги Арассыыйа Федерациятыгар олоробут, эрэгийиэннээҕи сокуоннар федеральнай сокуон сүрүн нуормаларыгар сөп түбэһиэхтээхтэр, утары буолуо суохтаахтар. Ол туһунан РФ Төрүт Сокуонун 15 ыстатыйатыгар этиллэн турар. Биири өйдүөхтээхпит – Төрүт Сокуон олоҕу кытта тэҥҥэ саҥардыллан иһэр, ол гынан баран өрөспүүбүлүкэ конституционнай тутулун төрүттэрин тутан турар сүрүн идиэйэлэр уларыйбаттар.

-Билигин Төрүт Сокуон 22 ыст. балаһыанньалара, ол иһигэр “РФ Үөрэхтээһин туһунан” сокуонугар сөп түбэһиннэрэн үөрэхтээһин таһымнара чуолкайдана сылдьаллар. Холобур, “оскуола тас өттүгэр үөрэхтээһин” диэн өйдөбүл билигин суох. Биһиги Төрүт Сокуоммутунан оскуола иннинээҕи, оскуола тас өттүнээҕи, орто уопсай уонна судаарыстыбаннай эбэтэр муниципальнай үөрэх тэрилтэлэригэр алын идэҕэ үөрэнии мэктиэлээхтэр. Оттон алын уопсай, сүрүн уопсай үөрэхтээһиннэргэ мэктиэ ханнаный?

Элбэх мөккүөрү Төрүт сокуон 22 ыст. 3 чааһыгар киирбит уларытыылар таһаардылар. Үлэлии турар нуорманан биһиэхэ орто уопсай үөрэхтээһин хайаан да баар буолуохтаах. Оттон оҕо 9 кылааһынан (сүрүн уопсай үөрэхтээһин) орто анал үөрэх тэрилтэтигэр үөрэнэ бардаҕына, Төрүт Сокуону кэһэригэр тиийэр дуо? Төрөппүт оҕотун 9 кылааһы бүтэрэрин хааччыйыахтаах. Оттон оҕо салгыы 10-11-с кылаастарга үөрэнэр баҕатын эмиэ туох да мэһэйдээбэт. “РФ Үөрэхтээһин туһунан” сокуонун 5 ыст. 3 чааһынан оҕо оскуола иннинээҕи, алын, сүрүн уопсай уонна орто уопсай үөрэҕи, орто анал үөрэҕи ыларын, ону тэҥэ үрдүк үөрэххэ аан бастаан туттарсарыгар куонкурустаһан босхо миэстэҕэ киирэн үөрэнэрин туох да хааччахтаабат. Барытыгар РФ сокуонун мэктиэтэ баар.