«Оҕо суола» испэктээк долгутта

   1941-45 сыллардааҕы Аҕа дойду уоттаах сэриитин дуорааннара төһө даҕаны ыраатталлар, ол сыллары билиҥҥи  көлүөнэ ыччат үөрэтэрэ долгутуулаах.

Бэрдьигэстээххэ оҕо ускуустубатын иһинэн үлэлиир Софрон Петрович Данилов аатынан Дьиикимдэ орто оскуолатын «Дебют» театральнай устуудьуйата Бор детдомун 80 сылынан «Оҕо суола» испэктээги нэһилиэккэ көрдөрдө. Режиссер Изабелла Максимова.

Бу детдомҥа сэрии ыар сылларыгар төгүрүк тулаайах хаалбыт, ону таһынан олорор усулуобуйалара ыарахаттардаах оҕолор  иитиллибиттэрэ, олорбуттара. Кинилэр ахтыыларыгар уонна сэрии ыар сылларыгар олох-дьаһах туһунан олоҕурбут испэктээк буолар. Бу туруорууну сэҥээрэ көрбүт көрөөччүлэр өйөбүллэригэр тирэҕирэн, Тааттатааҕы оҕо драматическай тыйаатыра «Кустук» уонна улууска оҕо тыйаатырын төрүттээбит  Мотрена Николаевна Вырдылина үбүлүөйдэригэр анаан, Ытык Күөлгэ өрөспүүбүлүкэтээҕи күрэскэ кыттыбыттара. Бу тэрээһиҥҥэ 31 оҕо тыйаатыра талааннарын көрдөрбүттэрэ

Ирдэбиллэрдээх дьүүлүүр сүбэ үрдүк сыанабылын ылан «Оҕо суола» испэктээк кыайыылаах тахсыбыта. Маныаха испэктээккэ  оҕолор ылыннарыылаахтык, итэҕэтиилээхтик оонньообуттара барыбытын долгуппута. Ону сэргэ хас биирдии көстүүгэ  сөп түбэһиннэрэн оччотооҕу кэми көрдөрөр үҥкүүнэн хамсаныылардаах, муусука тыаһынан доҕуһуоллаах буолан, көрөөччүлэр сэҥээриилэрин ылыан ылла. Испэктээк сүрүннээн икки көстүүттэн турар: бастакыта «Дьоллоох оҕо саас», иккиһэ «Бор детдома». Оҕолорбут бу курдук ситиһиилээхтик кыттыбыттара барыбытын үөрдэр.

Николай Осипов,

Дьиикимдэ, Горнай.

Хаартыскаҕа Снежана Чемезова түһэриитэ.