Оҕо төрөөтөҕүнэ, ипотекаҕа каникул бэриллиэн сөп

Судаарыстыбаннай Дума үп-харчы ырыынагар кэмитиэтэ парламент аллараа балаататыгар иккис, эбэтэр, онтон кэлэр оҕо төрөөтөҕүнэ, 1,5 сааһыгар диэри ипотека каникулун туһунан сокуон барылын бастакы ааҕыыга ылыналларыгар сүбэлээтэ. «Потребительскай кирэдьиит туһунан» сокуоҥҥа уларытыылар киириэхтээхтэр. Сокуон барылын Арассыыйа бырабыыталыстыбата көҕүлээбитэ диэн ТАСС суруйар.

Бу докумуон РФ Бэрэсидьиэнин сорудаҕынан, ипотеканан кирэдьиит ылар гражданнарга, иккис, эбэтэр онтон кэлэр оҕо төрөөтөҕүнэ, кирэдьиит биэрээччигэ дуогабарынан гражданин эбэһээтэлистибэлэрин тохтотон эрэргэ, эбэтэр, оҕо 15 сааһын туолуор диэри төлөбүрүн сууматын кыччатарга сайаапка түһэрэр быраабы биэрэр. Бу сокуон иккис, эбэтэр, онтон кэлэр оҕо төрөөтөҕүнэ, эбэтэр иитэ ыллахха, гражданнары өйүүргэ ананар.

Бу быраап кирэдьиит дуогабарын болдьоҕун устата биирдэ эрэ туһаныллыан сөп. Иккис уонна онтон кэлэр оҕо төрөөтөҕүнэ, каникул болдьоҕо 18 ыйтан тахсыа суохтаах, ол эрээри  оҕо 1,5 сааһын туолуор диэри болдьохтон уһун буолуо суохтаах, эбэтэр,  иитэ ылыллыбыт күнүттэн ыла 1,5 сылтан уһун буолуо суохтаах.

Кирэдьиит дуогабарын өрүттэрин икки ардыларыгар интэриэс тэҥнэһиитин хааччыйар туһуттан, бу чэпчэтиилээх кэм 7-с ыйыттан 18-с ыйыгар диэри кирэдьиит биэрээччи сөбүлэһиигэ ыйыллыбыт толору бырыһыаны ааҕа турар бырааптаах буолара этиллэр.

Кирэдьиит ылар киһи бастакы оҕо төрөөтөҕүнэ, эбэтэр,  иитэ ыллаҕына, чэпчэтиилээх болдьох быраабын эмиэ туһаныан сөп. Маннык түгэҥҥэ, кирэдьиит ылар киһи дохуота биир кэмҥэ 20%-тан тахса түстэҕинэ уонна ипотека төлөбүрэ дохуот 40%-тан тахса буоллаҕына, чэпчэтиилээх болдьох алта ыйтан аһарыа суохтаах.

Судаарыстыбаннай Дума сокуон барылын алтынньы 7 күнүгэр пленарнай мунньахха көрүөхтээх.