Оҕо улахан киһиттэн такайыллан, үлэ сатабылларыгар уһуйуллан тахсар

Таатта улууһун үөрэҕин тэрилтэлэрин икки ардыларыгар ыытыллар “Оҕо Сатабыла” күрэхтэһии быйылгы тэрээһинэ Арассыыйаҕа Аҕа дойдуну көмүскээччи, Саха сиригэр Ийэ дойдуну көмүскээччи, Таатта улууһугар Кыайыы сылларыгар ананна.

Ону кытта XXII Манчаары оонньууларын көрсө “Дьиэ кэргэн ытык мала” бырайыак чэрчитинэн Таатта талааннаах, ситиһиилээх спортсменнарын сырдатыы, үйэтитии, биисинэскэ холонор үлэни сайыннарар атыы-кутуу дьаарбаҥката тэрилиннэ.

“Үүммүт 2025 сыл – Улуу Ойуунускай убайбыт хоһуйбутун курдук, “таптал уотун күллэрэр тардыы талахтаах Таатта”  хас биирдии олохтооҕор ураты суолталаах сыл, —  диэн кэпсиир Тааттатааҕы “Сатабыл” оҕо айымньытын киинин методиһа Татьяна Портнягина. — Бу хоһооҥҥо хоһуйуллубут, ырыаҕа ылламмыт тардыы талах — Талыы Таатта сирин соргуну тардар күүһэ, сүдү суолталаах ытык маспыт буолар. Быйылгы “Оҕо Сатабыла” күрэхтэһиибит Таатта талаҕар — ытык дьайар маспытыгар ананна. Кулун тутар 14 күнүгэр «Оҕо Сатабыла» күрэх 8-с төгүлүн ыытылынна. Уопсайа улуус 8 үөрэҕин тэрилтэтиттэн 60-тан тахса кыттааччы 5 түһүлгэнэн күүстээх үлэни ыыттылар”.

Бу күрэхтэһиигэ оҕолор бэйэлэрин сатабылларын, дьоҕурдарын, талааннарын көрдөрөллөрүгэр көлүөнэлэр тэҥҥэ алтыһар эйгэлэрэ тэриллэр, ол курдук: эбээ сиэнинээн, эһээ сиэнинээн, төрөппүт оҕотунаан, учуутал үөрэнээччитинээн, дьиэ кэргэн оҕолоро бииргэ, дьүөгэлиилэр, доҕоттор, оскуолаҕа бииргэ үөрэнэр оҕолор биир тэтимҥэ киирэн, умсулҕаннаах үлэ дьоҕурун сайыннараллар, сатабыл ньымаларын тутталлар, өркөн өйдөрүнэн дьоҕурдарын тургуталлар. Ол эрээри бу бастыҥ диэн ааттанар быраабы сүгэргэ күөн көрсүү эрэ буолбатах, саҥа сатабылы, оҕолорго билиини-көрүүнү, элбэх саҥа доҕоттору бэлэхтиир сатабылы тургутуу буолар. Оттон кыттааччылар салайааччыларыгар үлэлэрин таһымын көрдөрөллөрүгэр, айымньылаах саҥа санааларын арыйалларыгар, идэтийии өттүгэр салгыы сайдалларыгар көҕүлээһин буолар. Киһи кэрэхсиирэ диэн, бу күрэхтэһии ааптарынан, муҥура суох кылаатын киллэрбит настаабынньыгынан биллэр уопсастыбаннай деятель, сахалартан бастакы социология билимин дуоктара, АГИКИ бэрэпиэссэрэ Ульяна Алексеевна Винокурова буолар.

“Күрэхтэһии биэс түһүлгэнэн барда, — диэн салгыы кэпсиир методист. – Бастакы түһүлгэҕэ “Чөл олох киэргэппит киһи киһитэ” — нэһилиэк чулуу спортсменнарын сырдатыы; иккискэ “Ийэ тыл, сурук-бичик, сахалыы саҥарыы» — сахалыы тыыннаах хаһыаты таһаарыы; үһүскэ «Өркөн Өй»  — “Тааттаҕа өркөн өйү эрчийии- Талахтан оҥоһуллубут оонньуурдар уонна талаҕы дьүһүйэн айыллыбыт оонньуулар”; төрдүскэ «Эһээ сатабыла» — талахтан «Дьайааччы кур” оҥоруу; бэһис түһүлгэҕэ “Барыыс” – атыы-эргиэн түһүлгэтэ тэрилиннэ.

Дьэ, биэс түһүлгэлээх күрэхтэһиибит түмүктэнэн, кэнчээри ыччаты саха сатабылыгар уһуйар “Оҕо Сатабыла” тэрээһиммит долгутуулаах түмүгэ билиннэ. Ол курдук I миэстэни Туора-Күөл орто оскуолатын хамаандата ылла,  II миэстэҕэ Уолба орто оскуолатын хамаандата таҕыста. Кыайыылаахтарга истиҥ эҕэрдэ. Бары кыттааччыларга, күрэхтэһии спонсордарыгар, эспиэрдэригэр барҕа махталбытын этэбит. Өбүгэлэрбит мындыр толкуйдарынан, өркөн өйдөрүнэн олоххо туһалааҕы айан-тутан, оҥорон таһаарар айылҕаттан талааннаах, ураты дьоҕурдаах этилэр. Төрүт дьарык сатабылын баһылаан, олох ыарахаттарын тулуйан, үлэлээн-хамсаан симэлийбэт, эстибэт норуот буолан, күн бүгүҥҥэ диэри кэллэхпит. Оҕо улахан киһиттэн такайыллан, үлэ сатабылларыгар уһуйуллан бэйэтин олоҕун сөпкө тэринэригэр бу «Оҕо Сатабыла” күрэх төһүү күүс буолуо диэн эрэнэбит”.