Оҕолор уопсастыбаннай хамсааһыннарын күнүнэн Ил Дархан Айсен Николаев эҕэрдэтэ

Оҕолор уопсастыбаннай хамсааһыннарын күнэ — сылын ахсын Саха Өрөспүүбүлүкэтигэр ахсынньы 5 күнүгэр бэлиэтэнэр.

Оҕолор уопсастыбаннай холбоһуктарын ытыктабыллаах бэрэстэбиитэллэрэ, күндү доҕоттор!

Өрөспүүбүлүкэҕэ Оҕолор уопсастыбаннай хамсааһыннарын күнүнэн итиитик-истиҥник эҕэрдэлиибин. Оҕо-аймах хамсааһына — үүнэр көлүөнэ көхтөөх гражданскай позициятын уонна бары өртүнэн эргиччи сайыннарар биир тутаах хайысхатынан буолар. Ааспыт сылларга айар, интеллектуальнай уонна социальнай эппиэтинэстэрин чаҕылхай холобурунан буолан, тыһыынчанан оҕону түмтэ.

1992 сыллаахха ахсынньы 5 күнүгэр тэриллибит Саха Өрөспүүбүлүкэтин оҕолор уопсастыбаннай холбоһуктарын сойууһа Саха уобаластааҕы пионерскай тэрилтэтин бастыҥ үгэстэрин салҕаан, оҕо тэрилтэлэрэ саҥа киэбинэн сайдалларыгар кыаҕы биэрбитэ. Бүгүн өрөспүүбүлүкэҕэ 800 тахса оҕо уопсастыбаннай холбоһугун түмэр «Дьулуур» биир кэлим оҕо хамсааһына таһаарыылаахтык үлэлиир. Онно 100 тыһыынчаттан тахса оҕо көхтөөхтүк кыттар. Оҕолор уонна тэрийээччилэр күүстэринэн кэнчээри ыччаты көҕүлүүр, угуйар, көлүөнэлэр ситимнэрин бөҕөргөтөр улахан бырайыактар олоххо киирэллэр.

РФ Бэрэсидьиэнэ Владимир Путин көҕүлээһининэн «Бастакылар хамсааһыннара» Бүтүн Арассыыйатааҕы оҕолор уонна ыччаттар уопсастыбаннай-судаарыстыбаннай хамсааһыннарын бырагырааматыгар оҕолор уопсастыбаннай холбоһуктарын киллэрии көхтөөхтүк барар.

Соторутааҕыта, сэтинньи 23-24 күннэригэр, СӨ оҕо хамсааһынын дэлэгээссийэтэ Москваҕа «Арассыыйа» Национальнай кииҥҥэ ыытыллыбыт «Бастакылар хамсааһыннара» сэминээргэ кыттыыны ылла.

Биһиги ыччаттарбыт уонна оҕолорбут тэрээһиннэргэ көхтөөхтүк кытталларыттан уонна салгыы сайдарга интэриэһинэй дьыалалары булалларыттан олус үөрэбин. Бу чахчы дойдуларын бэриниилээх гражданнара буола улааталларыгар улахан суолталаах. «Бастакылар хамсааһыннара» бу соругу быһаарарга көмөлөһөр.

Оҕолор уопсастыбаннай хамсааһыннарын өйөөһүн чэрчитинэн СӨ Ил Дарханын Грана олохтоммута. Быйыл аҕыс бырайыак 1 мөл. солк. суумалаах үбү-харчыны ылыахтара. Бу ааптардар идиэйэлэрин, сонун сүүрээни өрөспүүбүлүкэбит сайдыытын туһугар кылааттарын киллэрэллэригэр кыаҕы биэриэҕэ. Федеральнай уонна эрэгийиэн таһымнаах куонкурустарга кыттаннар, оҕолор сонун санаалара олоххо киирэн иһэр.

Оҕолор уопсастыбаннай тэрилтэлэрэ өрөспүүбүлүкэ бары суолталаах дьайыыларыгар көхтөөхтүк кытталлар. Ойуур баһаарын утары охсуһууга, бэтэрээннэргэ, байыаннай дьайыы кыттыылаахтарын дьиэ кэргэттэригэр, гуманитарнай көмөнү хомуйууга, ханна баҕарар кинилэр инники кэккэҕэ сылдьан кыайыы туһугар бэйэлэрин кылааттарын киллэрсэллэр.

Быйыл «Азия оҕолоро» Норуоттар икки ардыларынааҕы спортивнай оонньууларга 1900 тахса волонтер кыттыыны ылла. Кинилэр тэрээһин үрдүк таһымнаахтык ыытылларыгар көмөлөстүлэр.

Оҕолор уопсастыбаннай хамсааһыннарын бары уһуйааччыларыгар, көхтөөх кыттааччыларыгар кыһамньыгыт иһин махтанабын!  Чэчирии сайдар Саха сирин тутуохпут диэн эрэнэбин.

Эһиэхэ эйэни, үтүөнү, өрө көтөҕүллүүнү уонна ситиһиилэри баҕарабын! Өйдөөҥ, эһиги улаханы оҥорор кыахтааххыт. Хас биирдиигит сырдык кэскиллээх олоххо улахан суолу тэлиэххит!

Саха Өрөспүүбүлүкэтин Ил Дархана  А.С.Николаев