Оҕо, ыччат литературатын өйүүр сыаллаах “ Книжный ветер” дьаарбаҥка

Бэс ыйын 27 күнүгэр 11 чаастан норуоттар икки ардыларынааҕы аан бастакы «Книжный ветер» дьаарбаҥка аһыллыыта буолла. Манна куорат уокуругун баһылыга Евгений Григорьев, литературнай бырайыактар салааларын сэбиэдиссэйэ Евгений Харитонов (Москва к.), литературнай бырайыактар салааларын исписэлииһэ Елизавета Короткова (Москва к.),  саха мифологиятыгар олоҕурбут этническэй фентези ааптара Марина Сычева (Кемерово к.) кыттыыны ыллылар.

Дьокуускайдааҕы кииннэммит бибилэтиэкэ киинин дириэктэрэ Нюргуяна Решетникова этэринэн, оҕо, ыччат кинигэлэрин, литературатын киэҥ эйгэҕэ таһаарар сыалтан маннык дьаарбаҥка тэриллибит:  “Биһиги  эдэр суруйааччылары киэҥ эйгэҕэ таһаарыахпытын баҕарабыт. Бу дьаарбаҥкаҕа Арассыыйаттан 6 издательство кэллэ, кинилэр эдэр суруйааччылары таба көрдөхтөрүнэ, кинигэлэрин бэчээттиэхтэрин сөп. Дьаарбаҥка икки хайысхалаах. Бу билигин Орджоникидзе болуоссатыгар “Аһаҕас бырагыраама” буола турар. Ол аата издательстволар кинигэлэрин атыылыыллар, ону тэҥэ интеллектуальнай оонньуулары, викториналары ыыталлар. Бу кэлбит издательстволар: «Гнозис», «Умная книга», «Русское слово», онтон да атыттар биирдии ээкземпляр кинигэлэри аҕалбыттар, онон ылыан баҕалаахтар ыксааҥ. Оттон Smart бибилэтиэкэҕэ профессиональнай бырагыраама ыытыллыа. Холобур, бу Москваттан «Ыччакка аналлаах Арассыыйатааҕы судаарыстыбаннай бибилэтиэкэ» исписэлиистэрэ кэлэ сылдьаллар. Хайдах суруйуохха сөбүй, туохтан саҕалыахха сөбүй, ханнык кинигэни эдэр ыччат сөбүлүүрүй, эдэр суруйааччыларга биһиги хайдах көмөлөһүөхпүтүн сөбүй, диэн ыйытыыларга эппиэттиэхтэрэ, санааларын үллэстиэхтэрэ, маастар-кылаас ыытыахтара».

Кинигэ дьаарбаҥкатын тэрийээччи Розалия Ксенофонтова профессиональнай бырагыраамаҕа эппиэттээх эбит: “Дьаарбаҥка оҕо уонна ыччат литературатыгар ананар, СӨ Оҕо аймах сылын чэрчитинэн ыытылла турар. Бу билии-үөрэх бырааһынньыга, кинигэни таптааччылар көрсүһүүлэрэ. Икки күн устата ким баҕалаах кэлэн кыттыан сөп. Биһиги өрөспүүбүлүкэбит бастыҥ издательстволарын быыстапкатыгар уонна маҕаһыыннарыгар сылдьыаххыт. Эһигини маастар-кылаастар, куонкурустар, лекциялар, суруйааччылары кытта көрсүһүүлэр, онтон да атын  элбэх интэриэһинэй тэрээһиннэр күүтэллэр”.

Кинигэ дьаарбаҥкатыгар Москваттан «Аквилегия-М» (аныгы нууччалыы тыллаах  ааптардары бэчээттиир), «Гнозис» издательскай гуманитарнай дьиэ, «Карьера пресс» (тылбаас литературатын таһаарыыга идэтийэр), “Русское слово” (бу издательство үөрэх литературатын, ОГЭ уонна ЕГЭ бэлэмнэнии босуобуйаларын таһаарар), «Рифмоград» издательскай дьиэ,  Санкт-Петербуртан «Умная бумага» уонна Дьокуускайтан «Айар» кинигэ кыһата, “Кэскил” оҕо издательствота уонна «Starbooks» кинигэ маҕаһыына кытыннылар.

Евгения Петрова.