Оҕобун ханна сынньатабын?

Үөрэх дьыла түмүктэнэрэ чугаһаан, төрөппүттэр оҕолорун ханна сынньатар туһунан толкуйдууллар. Оҕо сайыҥҥы сынньалаҥын тэрийии боппуруоһунан Үөрэх уонна билим министиэристибэтэ төрөппүт аһаҕас мунньаҕын тэрийэн ыытта. Лааҕырдарга суруйтарыы ыам ыйын 15 күнүттэн саҕаламмыта.

560 лааҕыр аһыллыаҕа

Үөрэх уонна билим миниистирин бастакы солбуйааччы Михаил Присяжнай иһитиннэрбитинэн, күн бүгүн өрөспүүбүлүкэҕэ 153 055 оҕо баар. Былырыын онтон 46 бырыһыана сынньаммыт, доруобуйатын тупсарыммыт. “Быйыл оҕо 50 бырыһыанын хабар былааннаахпыт. 560 лааҕыр аһыллан үлэлиэҕэ. Итинтэн 434 — күнүскү, 48 — куорат таһынааҕы стационарнай, 44 — үлэ, сынньалаҥ, 34 — балаакканан”, — диэн эттэ.

Байыаннай дьайыы кыттыылаахтарын оҕолоругар ураты болҕомто уурулларын ыйда. 36 улууһу, куорат уокуругун кытта сөбүлэҥ түһэрсиллибит. Саха сириттэн барыта байыаннай дьайыы кыттыылааҕын 2733 оҕото сынньаныаҕа: 1973 оҕо — улууска, 200 оҕо — “Кэскил”, “Бэс Чагда”, “Энергетик” судаарыстыбаннай лааҕырдарга, 560 оҕо — кубуотанан Приморскай кыраайга.

“Бэс Чагда” оҕо сынньалаҥын уонна доруобуйатын чэбдигирдэр киин дириэктэрэ Варвара Васильева нормативнай баазаҕа улахан уларыйыы киирбитин эттэ. “Оҕо сынньалаҥа чахчы сынньалаҥ буоларын уонна доруобуйатын чэбдигирдэрин туһугар биһиэхэ 87 лааҕыр ирдэнэр. Суукканы эргиччи үлэлиэх этилэр. Бу олус улахан сыыппара”, — диэн этэр.

Варвара Альбертовна иһитиннэрбитинэн, быйыл 560 лааҕырга барыта 57 тыһ. оҕону сынньатар былааннаахтар. “Реестр ыам ыйын 15 күнүттэн аһыллар. Өрөспүүбүлүкэҕэ ханнык лааҕырдар бааллара каартаҕа көстүөҕэ. Сыллата сайаапка биэрэр төрөппүттэр билэллэр”, — диэн эттэ.

Судаарыстыбаннай өҥө порталын нөҥүө

Саҥа технологиялар институттарын бэрэстэбиитэлэ Дмитрий Данилов Судаарыстыбаннай өҥө порталын нөҥүө оҕону лааҕырга хайдах суруйтарыахха сөбүн туһунан кэпсээтэ. Хас биирдии төрөппүт ыам ыйын 15 күнүттэн саҕалаан, порталга киирэн “Оҕо сынньалаҥа” диэн көрдөөн сайабылыанньатын ыытар. “Төрөппүт “Семья и дети” диэҥҥэ киирэн оҕотун дааннайдарын эрдэттэн киллэрэн бэлэмнээн кэбиһиэн сөп. Сайабылыанньаны хас да оҕоҕо биэриэххэ сөп”, — диэн быһаарда. Ону тэҥэ, хас даҕаны оҕолоох төрөппүттэр хастыы даҕаны лааҕырга сайаапканы тэҥинэн ыытар кыахтаахтар.

“Бэс Чагда” лааҕырга

Өрөспүүбүлүкэҕэ биир киэҥник сэҥээриллэр “Бэс Чагда” лааҕыр начаалынньыга Лена Григорьева иһитиннэрбитинэн, лааҕырга Судаарыстыбаннай өҥө порталынан да, тус бэйэлэрэ тиийэн даҕаны суруйтарыахтарын сөп эбит. Судаарыстыбаннай “Бэс Чагда”, “Кэскил”, “Энэргиэтик” лааҕырдар аһыллыахтара. Симиэнэлэр ыам ыйын 30 күнүттэн атырдьах ыйын 31 күнүгэр диэри үлэлиэхтэрэ диэн эттэ.

Маннык докумуоннар ирдэнэллэр:

— миниистир аатыгар сайабылыанньа

— төрөппүт пааспарын куоппуйата

— оҕо төрөөбүтүн туһунан сибидиэтэлистибэтин эбэтэр пааспарын куоппуйата

— олорор сиртэн ыспыраапка (14 саастарыгар диэри оҕолорго)

— санаторнай-курортнай эмтэнии путевкатын ыларга 070у пуормалаах ыспыраапка

— 076 формалаах санаторнай-курортнай каарта

— сыстыганнаах ыарыы суоҕун туоһулуур ыспыраапка (болдьоҕо 3 күн)

— быһыы ылбыттарын туһунан сэртипикээт куоппуйата эбэтэр ыспыраапка (корь, манту, грипп булгуччулаах)

— мэдиссиинэ көмөтүн ыларга сөбүлэҥ

— тус дааннайдары бэрэбиэркэлэтэргэ сөбүлэҥ

— хаартыскаҕа, видеоҕа устарга көҥүллүүрүн туһунан сөбүлэҥ

— дуогабар.

Бу докумуоннар оҕо лааҕырга киирэригэр булгуччу баар буолуохтаахтар.

“Ыам ыйын 26–27 күннэригэр “Бэс Чагда” баазатыгар баһаатайдарга, устудьуоннарга үөрэтэр сэминээр ыытыахпыт. Ол иитинэн өрөспүүбүлүкэ бары лааҕырдарыгар баһаатайдар талыллыахтара. Сиһилии “Бэс Чагда” официальнай саайтыгар, ТГ ханаалыгар көрүөхтэрин сөп”, — диэн этэр.

Оҕону Саха сирин тас өттүгэр сынньатыы

Оттон оҕону Саха сирин тас өттүгэр сынньатыы туһунан “Бэс Чагда” оҕону сынньатар киин мэтэдииһэ, тустаах хайысханы сүрүннүүр Оксана Герасимова кэпсээтэ. “Үөрэх уонна билим министиэристибэтэ сыллата “Океан”, “Орленок”, “Смена” оҕо федеральнай кииннэрин уонна “Артек” норуоттар икки ардыларынааҕы киини кытта сөбүлэҥ түһэрсэр. Путевкалар интеллектуальнай уонна айар дьоҕур үрдүк таһымын көрдөрбүт талааннаах, айдарыылаах, успуорка уһулуччу көрдөрүүлээх, билим үлэтигэр ситиһиилээх оҕолору, уопсастыбаннай холбоһуктар лиидэрдэрин өйүүр соруктаах көрүллэр.

Быйыл 2025 сылга оҕо федеральнай кииннэригэр — 524: “Океаҥҥа” — 274, “Орленокка” — 40, “Сменаҕа” — 51, “Артекка” 159 кубуота көрүлүннэ”, — диэн эттэ.

Оҕо федеральнай кииннэригэр сынньанарга путевка ыларга “Путевка” автоматизированнай информационнай систиэмэҕэ (АИС) бэлиэтэнэр ирдэнэр. Маныаха оҕо электроннай буостата наада, оҕо тус кэбиниэтигэр киирэр сигэ (ссылка) манна кэлэр эбит. Тус кэбиниэтигэр оҕо бэйэтин дааннайдарын барытын киллэрэр: аатын (толору), кылааһын, оскуолатын, төрөөбүтүн туһунан сибидиэтэлистибэтин (14 сааһын туолбут буоллаҕына, пааспарын дааннайдарын), кэлиҥҥи 3 сыллаах ситиһиитин барытын угар. Итиэннэ бэйэтэ баҕарар симиэнэтигэр сайаапкатын ыытар.

Путевканы түҥэтии ситиһии эриэйтинэ төһө үрдүгүнэн көрөн (автоматически) барар эбит. Түмүгэ оҕо тус кэбиниэтигэр кэлэр.

Оҕо биир учетнай сурутууну (учетная запись) оҥостор. Иккиттэн элбэх түгэнигэр быраабыланы кэһиинэн ааҕыллан, заблокируйданар диэн иһитиннэрдэ.

Оттон “Океан” оҕо киинигэр сайаапка ыытарга төрөппүт бэйэтэ эмиэ тус кэбиниэт арынара булгуччулаах, оҕотун сайаапкатын бигэргэтэрэ ирдэнэрин мэтэдиис тоһоҕолоон ыйар.