Оҕоҕо СНИЛС туохха нааданый?

Социальнай пуонда Саха сиринээҕи салаата сыл саҕаланыаҕыттан саҕа төрөөбүт 4405 оҕоҕо тус счет страховой нүөмэрин (СНИЛС) иҥэрдэ.

Оҕо төрөөтө да, ЗАГС управлениетыгар регистрация кэнниттэн, туох да сайабылыанньата суох, СНИЛС нүөмэрэ иҥэриллэр. «Госуслуги» порталга ийэ тус кэбиниэтигэр иһитиннэрии кэлэр. Билигин СНИЛС электроннай буолан турар, ол эрээри, бу тус кэбиниэккэ кэлбит иһитиннэриини бэчээттээн баран, онно-манна көрдөрөргө илдьэ сылдьар мэһэйдээбэт.

Ийэ «Госуслуги» порталга тус кэбиниэтэ суох буоллаҕына, эбэтэр, оҕону иитэ ылбыт буоллахха, Социальнай пуондаҕа,эбэтэр, Элбэх өҥөнү оҥорор кииҥҥэ пааспары уонна оҕо сибидиэтэлистибэтин илдьэ баран, СНИЛС-ы оҥорторуохха наада.

«Госуслуги» портал тус кэбиниэтигэр баар дааннайдар уонна ЗАГС сибидиэнньэлэрэ сөп түбэһиэхтээхтэр. Дьахтар араспаанньатын уларыппыт буоллаҕына, тус кэбиниэтигэр эмиэ уларытыахтаах. Атын араспаанньа турар буоллаҕына, оҕо СНИЛС-ын туһунан иһитиннэрии кэлбэт.

СНИЛС Ийэ хапытаалын уонна булгуччулаах мэдиссиинэ страховкатын полиһын (ОМС) ыларга, поликлиникаҕа суруйтарарга, социальнай төлөбүрдэри ыларга, о.д.а. ирдэнэр.