Оҕоҕо түспүт лабрадор хаһаайына харчы төлүөҕэ

Ааспыт сыл алтынньытыгар Ленскэй оройуонугар дьиэ тиэргэнигэр хаһаайыннаах лабрадор оҕоҕо саба түспүтэ.

Хаһаайын ытын быалаан, томторуктаан илдьэ сылдьыбатах. Көрүүтэ-истиитэ суох хаалларар идэлээх эбит. Ол түмүгэр ыт оҕоҕо саба түһэн ытырбыт. Оҕо төрөппүттэрэ ыттаах хаһаайыны үҥсүбүттэр. Ыт хаһаайына мин ытым буолбатах диэн мэлдьэһэ сатаабыт. Ол эрээри ыт хаартыската уонна оҕо көрдөрүүлэрэ бу киһи ыта буоларын дакаастаабыт. Онон Ленскэй оройуонун суута эмсэҕэлээбит оҕоҕо 50 тыһ.солкуобайы ыттаах хаһаайын төлүүрүгэр уураахтаабыт.

Суут быһаарыыта күүһүгэр киирэ илик диэн СӨ холбоһуктаах сууттарын пресс-сулууспата иһитиннэрэр.