Оҕоломмут ийэни балыыһаттан таһаарар, оскуолаҕа киирбит оҕолору эҕэрдэлиир соруктаах бырайыак үлэлиир

«Саллааттар ийэлэрин сүрэхтэрэ» диэн өрөспүүбүлүкэ аҕа баһылыгын гранынан тэриллибит бырайыак үлэлиир. Байыаннай дьайыыга сылдьар байыастар ийэлэрин, дьиэ кэргэттэрин өйүүр бырайыак бу ааспыт сайын от ыйыттан үлэлиир. Чуолаан, бырайыак өрөспүүбүлүкэ хоту оройуонугар олорор дьиэ кэргэттэри хабар.

Ол курдук, Усуйаана, Дьааҥы, Анаабыр, Аллараа Халыма, Муома, Аллайыаха, Орто Халыма, Эдьигээн, Абый, Эбээн Бытантай, Өлөөн, Булуҥ, Үөһээ Халыма улуустара бырайыак географиятыгар киирсэллэр.

Бу туһунан байыастар дьиэ кэргэттэрин Саха сиринээҕи салаатын кэмитиэтин чилиэнэ Нюргуяна Хаютанова кэпсээтэ:

— Биһиги бырайыакпыт байыаннай сулууспалаахтар дьиэ кэргэттэрин өйүүргэ туһуланар. Өйөбүлбүт чэрчитинэн, саҥа оҕолонон тахсыбыт ийэни балыыһаттан таһаарыы, бастакы кылааска киирбит оҕолору эҕэрдэлээһин буолар. Нэһилиэнньэ ордук уйаҥ туруктаах дьонунан оҕо күүтэр ийэлэр буолаллар. Кэргэттэрэ байыаннай дьайыыга сулууспалыы сылдьар буоллаҕына, кини санныгар икки-үс бүк уустук буолар. Ордук уһук хоту сиргэ усулуобуйа ыарахана кини олоҕун-дьаһаҕын уустугурдар буоллаҕа. Сулууспалыы сылдьар аҕа оҕото төрөөн тахсар күнүгэр суох кэмигэр биһиги бырайыакпыт  ийэни өйүүр соруктаах санаатын көтөҕөр, балыыһаттан оҕолонон тахсарыгар көрсөр.

Маны сэргэ, оҕо аан бастаан оскуолаҕа киирэр үөрүүлээх күнэ олус долгутуулаах. Ол иһин байыаннай сулууспалаах дьиэ кэргэнигэр биһиги күүс-көмө, өйөбүл буолар соруктаахпыт. Үөрүүлээх быһыыга-майгыга кинилэри дойдуларыгар, ону сэргэ хоту сиртэн Дьокуускайга, мэдиссиинэ киинигэр уонна перинатальнай кииҥҥэ оҕоломмут ийэлэри эҕэрдэлиибит.

Бырайыакпыт биир сыл болдьохтоох. Бырайыак чэрчитинэн уопсайа 60 дьиэ кэргэн болҕомтоҕо, өйөбүлгэ тиксиэхтэрэ. Бырайыакпыт бастакы түһүмэҕэ түмүктэммитэ. Ол курдук, 12 хоту улуус 32 оҕотун оскуолаҕа киирбитинэн эҕэрдэлээбиппит, ону сэргэ хоту улууска икки саҥа киһи күн сирин көрбүтэ. Саҥа төрөөн тахсыбыт ийэлэри манна, Дьокуускайга, үөрүүлээх быһыыга-майгыга балыыһаттан таһаарбыппыт. Бырайыакпытыгар байыаннай сулууспалаахтар ийэлэрэ, кэргэттэрэ уонна уопсастыбанныктар үлэлэһэллэр. Саамай ыраах олорор бастакы кылаас үөрэнээччитэ Аллараа Халыма Андрюшкино бөһүөлэгин үөрэнээччитэ буолар. Бастакы кылааска киирээччилэргэ барыларыгар «Анюта» маҕаһыын оскуолаҕа киирэр нобуордары, ону сэргэ «Брауни бокс» тэрилтэ минньигэс бэлэҕин, оттон ийэлэригр сибэкки дьөрбөтүн  туттартаабыппыт. Саамай көхтөөх кыттыыны Муома улууһа ылбыта. Онно оҕолорго аналлаах тэрээһини урбаанньыт Оксана Шкулева тэрийбитэ. Оксана Александровна  оройуон дьахталларын сэбиэтин биир көхтөөх чилиэнэ буолар.