Оҕолор бэтэрээннэр олохторун сэргииллэр

Муус устар 16 күнүгэр Улуу Кыайыы 80   сылыгар анаммыт «Кыайыыны уһансыбыт аҕа саастаах көлүөнэҕэ сүгүрүйэбит!» диэн Улахан ааҕыылар буоллулар.

Бу тэрээһиҥҥэ кылаас аайы бэтэрээннэри күндү ыалдьыт буолалларыгар ыҥыран, биһиги нэһилиэкпит киэн туттар үлэ бэтэрээннэрэ, сэрии оҕолоро, Таатта улууһун Харбалааҕын  маҥнайгы тутааччылара сырыттылар.

Тэрээһиҥҥэ бэтэрээннэр үлэҕэ ситиһиилэрин иһин ылбыт наҕараадаларын иилинэн үөрэ-көтө кэллилэр. Үөрэнээччилэр аан айаҕар көрсөн аактабай саалаҕа атаардылар. Истиҥ тэрээһин аһыллыытын үөрүүлээх чааһын кэнниттэн бэтэрээннэри кылаас аайы тарҕатан оҕолор дакылааттарын иһиттибит. Хас биирдии үөрэнээччи сэрии кыттыылаахтарын, сэрии, тыыл бэтэрээннэрин, эһээлэрин, эбээлэрин туһунан кыһаллан үөрэппит, суруйбут дакылааттарын олус интэриэһинэйдик кэпсээтилэр.
Бэтэрээннэр тыыннаах сибэкки дьөрбөтүн тутан, оҕолор бэлэхтэрин ылан, ырыа, хоһоон истэн дуоһуйдулар, астыннылар.
Кэлэр көлүөнэ оҕолор үтүө, өйдөөх, сэмэй, бэрээдэктээх дьон үүнэн тахсан эрэллэриттэн үөрдүбүт  уонна учууталларга, үөрэнээччилэргэ истиҥ махтал тылларын ыытабыт.

Светлана ВИНОКУРОВА, бэтэрээннэр сүбэлэрин бэрэссэдээтэлэ