Хаартыска: ааптар тиксэриитэ
Атырдьах ыйын 1 күнүгэр улуустааҕы социальнай кэлим киин иһинэн үлэлиир «Кустук» оҕо былаһааккатын иитиллээччилэригэр күндү ыалдьытынан олоҕун 50 сылын оҕо иитиитигэр анаабыт, СӨ үөрэҕириитин туйгуна, РФ уопсай үөрэхтээһинин Бочуоттаах үлэһитэ, педагогическай үлэ бэтэрээнэ Галина Никитична Иванова-Айтыына буолла.
Кини оҕоҕо анаан суруйбут айымньылара хоһоонтон саҕалаан олоҥхоҕо тиийэ олус элбэх. Маннык дэгиттэр суруйар идэлээх киһи сэдэхтик көстөр. Онон кини суруйааччы быһыытынан оҕолору кытары көрсүһүүгэ атах тэпсэн олорон кэпсээтэҕинэ, бэйэтин кинигэлэрин көрдөрө-көрдөрө быһаардаҕына, сүбэлээтэҕинэ, оҕоҕо түргэнник тиийэрэ, өйдөнөрө саарбаҕа суох.
Галина Никитична аҥардас кинигэни ааҕыыга эрэ буолбакка, оҕону киһи быһыытынан иитиигэ, ийэ тылга тапталы, ытыктабылы иҥэриигэ киллэрэр кылаата сүҥкэн. Ол да иһин, бу тэрилтэ реабилитационнай киин да эрдэҕинэ, кинини иитиллээччилэри кытары үгүстүк көрүһүннэрэр этэ. Уопуттаах педагог сырыы аайы туох эрэ сонуну этэр, соһуччу үөрүүнү бэлэхтиир буолара. Бу да сырыыга ыалдьыт кэрэ кэһиилээх кэлбит. Ол туһунан иитээччи Вероника Новгородова маннык кэпсиир:
«Көрсүһүү саҕаланыытыгар ыалдьыппыт: «Оҕолоор, эһиги бүгүн бу буруолуу сылдьар саҥа айымньыбын аан бастакынан билсэҕит. Атын ким даҕаны көрө да, истэ да илик», — диэн намыын куолаһынан саҕалаан кэпсээн киирэн барбытыгар оҕолор чуумпура түстүлэр. Бу «Билбэччэй» диэн ааттаах оҕолорго аналлаах остуоруйа эбит. Остуоруйатынан бэйэтэ үчүгэйдик уруһуйдаабыт эбит, ону оҕолор кэрэхсээн көрдүлэр-иһиттилэр. Сорох оҕолор чугаһаан кэлэн, уруһуйдары илиилэригэр ылан хаттаан көрбүттэрэ. Галина Никитична өссө атын 2 остуоруйаны кэпсээбитэ уонна хоһооннорун аахпыта. Оҕолор «Ойуоккалыыбыт, ыстаҥалыыбыт — биир, ойуоккалыыбыт, ыстаҥалыыбыт – икки…» диэн ахсаан туһунан хоһооҥҥо оонньоон үөрдүлэр-көттүлэр, ытыстарын таһыннылар».
Аны иитиллээччи Володя Алексеев туох диэбитин истиэҕиҥ:
“Галина Никитична суруйааччы эбит. Кини биһиэхэ оҕолорго анаан суруйбут кинигэлэрин көрдөрдө. Кини элбэх да элбэх кинигэлээх. Биһигини кинигэтэ ааҕыҥ диэн сүбэлээтэ, элбэҕи кэпсээтэ. Мин бүгүҥҥү көрсүһүүнү олус сөбүлээтим”.
Билиҥҥи кэмҥэ оҕолор кинигэни аахпат буолбуттарын бары билэбит. Биллэн турар, биир эмэ ааҕар оҕо баара чуолкай. Аныгы кэмҥэ оҕо кинигэни аахпат буолуута — барыбыт уопсай кыһалҕабыт. Дьэ, бу туһунан уопуттаах педагог наһаа үчүгэйдик ыпсаран-хопсорон быһааран биэрбитин оҕолор ылыммыттар, кинигэни ааҕыах буолан сөбүлэспиттэр. Бу кэнниттэн саатар биир эмэ оҕо ааҕан саҕалаатаҕына ситиһии буолуо этэ. Ааптар бэйэтэ айымньы нөҥүө оҕону кэрэҕэ, сырдыкка уһуйар сыалы-соругу куруук өрө тутар, ийэ тылы күннээҕи олоххо сөпкө туттан саҥаралларыгар кыһаллар.
Кэрэ киһиэхэ Галина Никитичнаҕа олус суолталаах көрсүһүү иһин истиҥник махтанабыт уонна саҥа айымньыта күн сирин көрөрүгэр баҕарабыт!
Светлана БУРЦЕВА, уопсастыбаннай кэрэспэдьиэн
Дьогдьоот күһүн буолла. Көтөҕө түһэ да илигинэ, хаар түһэн, маҥан суорҕанынан сири-дойдуну бүрүйдэ, онтон эмиэ…
Снайпердар күрэхтэһиилэригэр бойобуой сырыылары ааспыт, идэтийбит байыаннай дьону кытта любитель ытааччылар эмиэ кытталлар. Дыгын Попов,…
Култуура киинэ (кулууп) диэн ханнык баҕарар дэриэбинэ, бөһүөлэк, нэһилиэк тэбэр сүрэҕэ диэтэхпинэ сыыспатым буолуо. Киинэ…
Билигин аутизм курдук диагнозтаах оҕо олус элбэх. Ити эдэр ийэлэр оҕо күүтэр кэмнэригэр аһары көмпүүтэргэ,…
Бүгүн “Сулус” полигон базатыгар ыраах дистанцияны ытыыга снайпинг аһаҕас турнира буола турар. Кылаабынай судьуйа Юрий…
Байыаннай дьайыыга, биһиги Сахабыт сириттэн элбэх ньургун уол, аҕа дойдуларын иннигэр иэстэрин толороллор, хорсуннук туруулаһаллар.…