Оҕолор Кыайыыга аналлаах түһүлгэлэрэ

Ыам ыйын 4 күнүгэр Оһуокай уопсастыбатын өрөбүл аайы буолар Кыайыы Оһуокайа үрдүк таһымнаахтык ааста.
Бу сырыыга Саха сирин үтүөлээх этээччитэ Мария Иванова үөрэнээччилэринээн кэлэн Кыайыы Оһуокайын түһүлгэтин төрүттээтилэр. Мария Марковна Дьокуускай иккис нүөмэрдээх оскуолатыгар фольклор учууталынан айымньылаахтык үлэлиир. Хомуска дьарыгын сэргэ оһуокайы оҕолорго эрчийэн, оҕолор хаамыылара, тыллара-өстөрө хомоҕойун бары сэргээтибит. Маны сэргэ Дьокуускайдааҕы гимназияттан үс үөрэнээччи кэлэн аан бастаан холоннулар.
Оҕолору кытары Саха сирин үтүөлээх этээччитэ К.Н.Евсеева дьарыктанан эрэр.
Дьокуускайдааҕы иккис нүөмэрдээх оскуолатын алын кылааһын үөрэнээччилэрэ, төрөппүттэрэ кэлэн оҕолорун кытары киэҥ түһүлгэни төрүттээтилэр. Бастакынан түһүлгэни төрдүс кылаас үөрэнээччитэ Олег Винокуров эттэ. Оскуолаттан 11 оҕо кэлэн киэҥ түһүлгэни төрүттээтилэр. Быыһыгар Айыына Кириллова тойугунан эҕэрдэлээтэ.

Оскуола иһиттэн Утум хомусчуттар бөлөхтөрө уонна үһүс кылаас үөрэнээччитэ Витя Васильев хомустаата. Витя маны сэргэ оһуокай түһүлгэтин түмүктээтэ.
Оһуокай түһүлгэтигэр «Дьээ буо» этнофольклорнай бөлөх эҕэрдэлээтэ.
Оҕолорбут, утум тутааччыларбыт Оһуокайы көҕүлүттэн туппуттарыгар олус аастынныбыт. Утум салҕаннын, быстыбатын!

Марта Николаева. Ааптар хаартыскаҕа түһэриилэрэ