Оҕолор Москваҕа «Щелкунчик» испэктээккэ босхо сырыттылар

Анал байыаннай дьайыы кыттыылаахтарын оҕолоро Москваҕа Улахан тыйаатырга “Щелкунчик” испэктээккэ сырыттылар. Тэрээһини Ыччат дьыалаларыгар федеральнай ааҕыныстыба Волонтердар кииннэрин ассоциациятын көмөтүнэн тэрийдэ.

Биэс оҕону ийэлэрэ арыаллаан илдьэ сырыттылар. Улахан тыйаатырга “Щелкунчик” испэктээги Бүтүн Арассыыйатааҕы #МыВместе аахсыйа чэрчитинэн көрдөрдүлэр. Онон киэҥ нэлэмэн Арассыыйа бары муннуктарыттан кэлэн, анал дьайыы кыттыылаахтарын оҕолоро уонна #МыВместе  эрэгийиэннээҕи ыстааптарын волонтердара көрдүлэр.

Ону тэҥэ, Саха сириттэн тиийбит дьиэ кэргэттэр Саҥа дьыллааҕы симэммит-киэргэммит Москваны көрдүлэр, кэрэ-бэлиэ миэстэлэринэн дуоһуйа күүлэйдээтилэр, араас култуурунай тэрээһиннэргэ сырыттылар. Онон оҕолор олус астыннылар, кинилэргэ бэртээхэй каникул буолла. Оттон ийэлэр бу умнуллубат айаны тэрийээччилэргэ махтаннылар.

Байыаннай сулууспалаахтар дьиэ кэргэттэрин айаныгар “Якутия” авиа-хампаанньа уонна Саха сирин Бастайааннай бэрэстэбиитэлистибэтэ көмөлөстүлэр диэн СӨ бырабыыталыстыбатын пресс-сулууспата иһитиннэрэр.